کراچی (اسٹاف رپورٹر) سندھ ہائی کورٹ میں منگل کو جیوکی پٹیشنزکی سماعت کے موقع پر جیوکے سیکڑوں کارکن ہائی کورٹ کے باہر جمع تھے جنہیں گیٹ پر متعین پولیس نے گیٹ سے اندر آنے کی اجازت نہیں دی، صرف چند کارکن عدالت پہنچ سکے۔ سماعت کے موقع پر جیو ٹی وی نیٹ ورک کے پریزیڈنٹ عمران اسلم، پروگرام پچاس منٹ کے میزبان عبدالرؤف، جوابدہ کے میزبان افتخار احمد اور ایک دن جیو کے ساتھ کے میزبان سہیل وڑائچ بھی موجود تھے۔ اس موقع پر عدالت کی جانب سے کوئی عبوری ریلیف نہ ملنے اور سماعت ایک ہفتہ ملتوی ہونے پر جیوکے کارکنوں نے مایوسی کا اظہارکیا۔ عدالت کی جانب سے سماعت ایک ہفتہ ملتوی ہونے کی خبر پر پورے ملک سے سول سوسائٹی، وکلا اور صحافیوں کی جانب سے بھی مایوسی کا اظہارکیا گیا ہے۔

__________________