بغداد............…عراقی فوجیوں نے امریکی کمپنی کے ساتھ سفر کرنے والے غیر ملکیوں سمیت 43 افراد کو خاتون پر فائرنگ کے سلسلے میں حراست میں لے لیا ہے تاہم ان میں کوئی امریکی شہری شامل نہیں ہے۔عراقی فوج کا کہنا ہے کہ امریکی فوج کو سامان فراہم کرنے والی فرم کا قافلہ شاہراہ کی غلط سمت سفر کررہا تھا جب عراقی خاتون کو فائرنگ کرکے زخمی کیا گیا۔حالیہ واقعہ غیر ملکی سیکورٹی گارڈ کی فائرنگ سے عراقی شہریوں کی ہلاکتوں کا تسلسل ہے۔ گرفتار افراد میں زیادہ تر سری لنکن شہری بتائے جاتے ہیں۔متحدہ عرب ا مارات سے تعلق رکھنے والی فرم کے پاس امریکی زیر قیادت اتحادی فوج کو کھانا ،پانی اور دیگر ضروریات زندگی کا سامان فراہم کونے کا ٹھیکہ تھا۔امریکی فوجی ترجمان کا کہنا ہے کہ ابھی یہ واضح نہیں کہ حادثے کے وقت وہ امریکی کنٹریکٹ کے لئے کام کررہے تھے یا کسی اور ٹھیکے کیلئے کام کیا جارہا تھا۔ابتدائی اطلاعات میں عراق فوج کے ترجمان بریگیڈئر جنرل قاسم الموساوی نے کہا تھا کہ گرفتار افراد میں دو امریکی ،21 سری لنکن ،9 نیپالی اور 10عراقی باشندے شامل ہیں۔

__________________