عرب دنیا میں تعلیمی اصلاحات کی فوری ضرورت ہے،عالمی بینک کی رپورٹ
عمان . . . عالمی بینک نے کہا ہے کہ عرب دنیا میں تعلیمی معیار دنیا کے دوسرے خطوں کے لحاظ سے پیچھے ہے۔ برطانوی نشریاتی ادارے کے مطابق عالمی بینک نے اپنی رپورٹ میں بتایا ہے کہ عرب دنیا میں بے روزگاری پر قابو پانے کے لیے فوری تعلیمی اصلاحات کی ضرورت ہے۔ لاطینی امریکا اور ایشیا جیسے خواندگی اور تعلیمی اداروں میں اندراج کی شرح جس طرح بڑھ رہی ہے وہ یہاں دیکھنے میں نہیں آتی۔ مراکش، عر اق ،یمن اور ڈمیوٹی میں تعلیمی اصلاحات بدترین ہیں۔ عالمی بینک کے سینئر اہل کار ماروان مواشر نے کہاکہ عرب دنیا میں بے روزگاری کے خاتمے اور تیزی سے بدلتی ہوئی دنیا میں بہتر طور پر نوجوانوں کو صلاحیتوں سے روشناس کرانے کے لیے تعلیمی اصلاحات ان ملکوں میں پہلی ترجیح ہونی چاہیے۔ عرب دنیا کے لیے وقت آگیا ہے کہ وہ اپنی توانائیاں معیار تعلیم پر صرف کریں اور اپنے طالب علموں کو مارکیٹ کی ضرورت کے مطابق تیار کریں اور ان میں مسائل حل کرنے، تنقیدی سوچ واختراع کی صلاحیتیں پیدا کریں اور اساتذہ کو تربیت فراہم کریں۔ رپورٹ کے مطابق عرب دنیا میں بے روزگاری کی شرح دنیا میں افریقی ممالک کو چھوڑ کر سب سے زیادہ 14 فیصد ہے اور سب سے زیادہ شرح فلسطین میں 26 فیصد ہے۔ رپورٹ میں بتایا گیا ہے کہ عرب دنیا نوجوانوں سے زرخیز ہے اور یہاں کی آبادی میں 60 فیصد سے زائد آبادی 30 سال سے کم عمر افراد پر مشتمل ہے۔

__________________