عرفان قادر کی تقرری کا امکان



اسلام آباد (جنگ نیوز)حکومت نے قومی احتساب بیورو کے سابق پراسیکیوٹر جنرل اور سپریم کورٹ کے سینئر وکیل عرفان قادر کو اسلام آباد ہائی کورٹ کا پہلا چیف جسٹس مقرر کرنے کا اصولی فیصلہ کر لیا ہے اور اس ضمن میں سمری وزارت قانون نے صدر مملکت کو بھجوا دی ہے۔ صدر پرویز مشرف کی طرف سے کی گئی آئینی ترمیم کے تحت وفاقی دارالحکومت میں ہائی کورٹ قائم کی جا رہی ہے جو توقع ہے کہ آئندہ ماہ کام شروع کر دے گی اور لاہور ہائی کورٹ راولپنڈی بنچ میں اسلام آباد سے متعلقہ مقدمات اس ہائی کورٹ کو منتقل ہو جائیں گے۔