10 نومبر 2010
واشنگٹن(مانیٹرنگ ڈیسک )امریکہ کےسابق صدرجارج ڈبلیو بش نے کہا ہے کہ دہشت گردوں کے خلاف کارروائی میں پاکستان کے عدم تعاون پر ڈرون حملوں کا حکم دیا۔سابق امریکی صدر جارج ڈبلیو بش نے اپنی کتاب ڈیسیڑن پوائنٹ میں لکھا ہے کہ پاکستان سے پیچیدہ نوعیت کے تعلقات تھے۔دہشت گردی کے خلاف جنگ میں پاکستان نے بھاری قیمت چکائی مگر وقت کے ساتھ یہ بات واضح ہوگئی اور وہ اس بات پر قائل ہوگئے کہ پاکستان دہشت گردوں کے خلاف کارروائی نہیں کرے گا، یا وہ ایسا کرنا نہیں چاہتا۔ جس پر انہوں نے ڈرون حملوں کا حکم دیا۔ سابق صد ر بش نے اپنی کتاب میں لکھا ہے کہ آئی ایس آئی کے بعض عناصرکے طالبان سے روابط تھے جبکہ بعض امریکا کے افغانستان چھوڑنے کی صورت میں بھارتی اثر و نفوذ نہ ہونے کی یقین دہانی چاہتے تھے۔ بش کے مطابق جب افغانستان سے لوٹنے والے بعض فوجیوں نے پاکستان کے اندر جاکر کارروائی کی اجازت طلب کی تو وہ تناﺅ کا شکار ہوگئے۔ بش کا کہنا ہے کہ نائن الیون کے بعد تیرہ ستمبر دوہزار ایک کو جنرل کولن پاول نے پرویز مشرف کو فون کیا اور کہا کہ پاکستان کو فیصلہ کرنا ہے کہ وہ کس کے ساتھ ہے؟ اس موقع پر پرویزمشرف سے دو ٹوک مطالبات بھی کئے گئے۔ جن میں طالبان سے روابط منقطع کرنے اورالقاعدہ کے ٹھکانوں کا خاتمہ بھی شامل تھا۔ بش کے مطابق پاکستان کی سوچ پر بھارت سوار تھا جو امریکہ سے تعاون کی راہ میں رکاوٹ بنا۔ پرویز مشرف امریکی حکام سے ہونے والی گفتگو میں انڈیا پر غلط کاریوں کا الزام عائد کیا کرتے تھے۔ سابق صدر کی کتاب کو امریکی عوام میں پذیرائی مل رہی ہے۔ دکانوں پر ایک طرف کتاب کے حصول کیلئے جمع ہونے والوں کا ہجوم ہے تو دوسری طرف بش کے خلاف مظاہرے بھی ہو رہے ہیں۔بش نے یہ اعتراف بھی کیا کہ پاکستان سے عسکریت پسندوں کو لینے کے لیے پاکستان کوبھاری قیمت دی۔امریکی و اتحادی فورسز نے افغان سرحد کے پاربھر پور کارروائیاں کیں۔ بش کہتے ہیں کہ وقت گزرنے کے ساتھ انہیں واضح ہو گیا کہ مشرف کبھی بھی وعدے پورے نہیں کریں گے۔

__________________
جاویداسد