اسلام آباد ۔۔۔۔۔۔۔ عشرہ محرم کے احترام میں تمام سیاسی جماعتوں نے انتخابی مہم غیراعلانیہ طور پر معطل کر دی۔ عاشورہ کے بعد بھرپور انداز میں دوبارہ انتخابی مہم کا آغاز کیا جائے گا۔ اتوار کو بات چیت کرتے ہوئے پیپلز پارٹی کے رہنما راجہ پرویز اشرف نے کہا کہ پیپلز پارٹی نے عشرہٴ محرم کے احترام میں انتخابی مہم کو جاری نہ رکھنے کا فیصلہ کیا ہے، مسلم لیگ (ن) کے رہنما راجہ ظفرالحق نے بتایا کہ امام عالی مقام حضرت امام حسین کی شہادت تاریخ اسلام کا افسوسناک واقعہ ہے، محرم الحرام کے دوران پوری اسلامی دنیا ایک سوگ کی کیفیت میں ہوتی ہے، اس لئے مسلم لیگ (ن) نے یوم عاشور تک اپنی انتخابی سرگرمیوں کو محدود کرنے کا فیصلہ کیا ہے۔ انہوں نے کہا کہ عاشورہ کے بعد مسلم لیگ (ن) بھرپور انداز میں انتخابی مہم چلائے گی۔ اے این پی کے ترجمان زاہد خان نے کہا کہ محرم الحرام کا احترام سب کی ذمہ داری ہے، ہم نے عاشورہ تک اپنی انتخابی سرگرمیاں محدود کر دی ہیں، عاشورہ کے بعد اے این پی بھرپور انداز میں انتخابی مہم کے میدان میں اترے گی۔ متحدہ مجلس عمل کے رہنما علامہ عبدالجلیل نقوی نے کہا کہ متحدہ مجلس عمل انتخابات میں بھرپور انداز میں حصہ لے رہی ہے لیکن عاشور کے دوران انتخابی مہم چلانا مناسب عمل نہیں، اس لئے ہم نے محرم کے دوران انتخابی مہم روک رکھی ہے، عاشورہ کے بعد بھرپور انداز میں رابطہ مہم شروع کی جائے گی۔ ایم کیو ایم کے رہنما سید حیدر عباس رضوی نے بتایا کہ کراچی اور اندرون سندھ محرم بھرپور انداز میں منایا جا رہا ہے، ایم کیو ایم میں تمام مکاتب فکر کی نمائندگی ہے اور امام حسین کی ذات تو ایسی ہے جو دنیا میں وحدت کی علامت ہے۔ انہوں نے کہا کہ ہم نے انتخابی سرگرمیوں کو امام کی احترام میں محدود کر دیا ہے، عاشور کے بعد بھرپور انداز میں انتخابی مہم شروع کی جائے گی۔