نوڈیرو(ایجنسیاں) پاکستان پیپلز پارٹی کے شریک چیئرمین آصف علی زرداری نے کہا ہے کہ پاکستان پیپلز پارٹی کے تمام عہدیداران و کارکنان اپنی عظیم قائد محترمہ بے نظیر بھٹو صاحبہ کے مشن کو پورا کرنے کیلئے اپنی تمام توانائیاں انتخابی سرگرمیوں پر صرف کردیں تاکہ آئندہ عام انتخابات میں تاریخی کامیابی حاصل کرکے ملک و قوم کو شہید محترمہ بھٹو کی خواہشات کے مطابق دوبارہ ترقی و خوشحالی کی سمت گامزن کیا جاسکے وہ اتوار کو بھٹو ہاؤس نوڈیرومیں پاکستان پیپلز پارٹی سندھ ایگزیکٹیو ز اور تمام اضلاع کے صدور‘ سیکریٹریز کے مشترکہ اجلاس سے خطاب کررہے تھے اجلاس کے آغاز پر شہید محترمہ بینظیر بھٹو کے ایثال ثواب کیلئے فاتحہ خوانی کی گئی اجلاس سے پیپلز پارٹی کے صوبائی صدر سید قائم علی شاہ‘ آفتاب شعبان میرانی اور نثار کھوڑو نے بھی خطاب کیا۔ انہوں نے کہا کہ مجھ سمیت پارٹی کے تمام کارکنوں پر یہ فرض عائد ہوگیا ہے کہ وہ عام انتخابات کے دن خود بھی پولنگ اسٹیشنوں پر جائیں اور عوام کو بھی اپنے ساتھ لے جائیں پی پی پی کے عہدیداران و کارکنان پولنگ کے دن ووٹ ڈال کر واپس گھروں کو لوٹنے کے بجائے پولنگ اسٹیشنوں پر ہی موجود ہیں اور اپنے ہاتھوں سے انتخابی نتائج وصول کریں کیونکہ عوامی قوت کے ہی بل بوتے پر دھاندلی کے ریاستی منصوبوں کو ختم کیا جاسکتا ہے انہوں نے اجلاس سے اپنے خطاب میں پارٹی کے اس مطالبے کو پھر دہرایا کہ شہید محترمہ کے قتل کی تحقیقات اقوام متحدہ کی قائم کردہ حریری کمیشن کے طرز پر کی جائے Pppاپنے اس مطالبے سے ہرگز و ستبردار نہیں ہوگی اگر حکومت نے ہمارے اس مطالبے کو تسلیم نہیں کیا تو ہماری آنے والی حکومت اس حوالے سے خود اقوام متحدہ سے رجوع کریگی ۔آصف علی زرداری نے پاکستانی قوم سے اپیل کی کہ وہ عام انتخابات کے دن زیادہ سے زیادہ تعداد میں اپنے گھروں سے باہر نکلیں اور ”تیر“پر مہر لگاکر اپنی عظیم قائد شہید محترمہ بینظیر بھٹو کے قتل کا بدلہ لیں کیونکہ شہید محترمہ بینظیر بھٹو نے اپنے ملک وقوم کی خاطر جو قربانیاں دی ہیں اس کی تاریخ میں کوئی مثال نہیں ملتی اجلاس میں راشد حسین ربانی‘ وقار مہدی‘ آغاسراج درانی‘ عبدالخالق سومرو‘ پیر آفتاب شاہ جیلانی ‘ جام سیف اللہ وھاریجو‘ رفیق انجینئر ‘ جام مہتاب‘ ارباب وزیر میمن ‘ زاہد بھرگڑی ‘ غلام قادر بھٹو ‘ جاوید علی شاہ‘ علی مروان شاہ‘ ڈاکٹر مہیش مالانی‘ آپار قیہ سومرو‘ سیمی سومرو سمیت سندھ کے تمام ضلعی صدور و سیکریٹریز نے شرکت کی۔