اسلام آباد (جنگ نیوز) صدر جنرل پرویز مشرف نے قوم پر زور دیا ہے کہ وہ پاکستان کے محفوظ اور روشن مستقبل کیلئے انتہا پسندی اور دہشت گردی کے خلاف جنگ میں حکومت کا بھرپور ساتھ دے، ملک کو اس وقت دہشت گردی اور انتہا پسندی کا اندرونی خطرہ ہے، ملک کی سلامتی کو یقینی بنانا، ملک کی ترقی اور عوام کی فلاح و بہبود کیلئے اقدامات کرنا حکومت کی اولین ذمہ داری ہے،انہوں نے کہا کہ انتہا پسندی دہشتگردی کی ابتدائی شکل ہے،ملکی سلامتی کو خارجی نہیں داخلی خطرہ ہے،مذہب کے نام پر قوم کو گمراہ ہونے نہیں دیں گے۔انہوں نے کہا کہ کسی بیرونی خطرے سے نمٹنے کی حکمت عملی قابل بھروسہ مناسب دفاعی صلاحیت برقرار رکھنے پر مبنی ہے، عزت و وقار کے ساتھ امن کے قیام کے خواہاں ہیں۔ انہوں نے ان خیالات کا اظہار جمعرات کویہاں ایک ٹی وی پروگرام کرتے ہوئے کیا جس کا موضوع ”حکومتی ذمہ داری: سیکورٹی کے تناظر میں“ تھا۔ صدر نے کہا کہ ملک کی سلامتی کو کوئی بیرونی خطرہ نہیں تاہم داخلی طور پر انتہاء پسندوں اور دہشت گردوں سے خطرہ ہے۔ انہوں نے کہا کہ انتہا پسندی اور دہشت گردی دو الگ مظہر ہیں۔ دہشت گردی کے ساتھ طاقت اور سختی سے نمٹنے کی ضرورت ہے، اس کو جڑ سے اکھاڑ پھینکنے کی ضرورت ہے تاہم انتہا پسندی ایک ذہنیت کا نام ہے، اس سوچ کے تحت انتہا پسند شخص اپنی سوچ کو ہی ٹھیک سمجھتے ہوئے اسے دوسروں پر مسلط کرنا چاہتا ہے جس سے معاشرے میں بگاڑ پیدا ہوتا ہے۔

__________________