عوام نے صدر پرویز کے قریبی ساتھیوں کو مسترد کردیا،فاروق لغاری
چوٹی زیریں(نمائندہ جنگ) سابق صدرپاکستان اور مسلم لیگ(ق) کے رہنما سردار فاروق لغاری نے کہا ہے کہ جنرل الیکشن میں عوام نے صدر پرویز مشرف کے قریبی ساتھیوں کو مسترد کردیا ہے۔ بجلی، گیس اور آٹے کے بحران نے کام کردکھایا۔ وہ لغاری ہاؤس میں کامیابی پر مبارکباد دینے کے بعد لوگوں سے گفتگو کررہے تھے۔انہوں نے مخالف پارٹیوں کی کامیابیوں کے حوالہ سے کہا کہ پی پی کو تو بے نظیر کی شہادت کی وجہ سے کامیابی ہوئی۔ مگر نوازشریف کاریلا کیسے چل نکلا ،یہ سمجھ سے باہر ہے۔انہوں نے کہاکہ لغاری خاندان میں صلح ہوچکی ہے اور دعا کریں کہ وہ قائم رہے۔ انہوں نے کہا کہ حلقہ این اے173پر سردار اویس لغاری کی سیٹ پر دھاندلی ہوئی ہے اور بڑے پیمانے پر ووٹ مسترد کیے گئے۔ جن کی تعداد5ہزارسے زائد ہے۔انہوں نے کہا کہ ایک پولنگ کھرفورٹ منرو کو متنازع قراردیاگیا تاہم میری کامیابی مخالف امیدوار پر واضح ہے۔

__________________