پھیکی پھیکی ہی سہی، عید مگر ہے تو سہی
پہلے جیسی نہ رہی، عید مگر ہے تو سہی
میرے غم کا بھی سبب پوچھ رہی ہے مجھ سے
خوش نہیں ہے نہ سہی، عید مگر ہے تو سہی
اس سے پہلے بھی کئی زخم دیئے ہیں مجھ کو
اک نئی چوٹ سہی، عید مگر ہے تو سہی
نیا ملبوس چھپا لیتا ہے جانے کیا کیا
کیا خوشی، کیسی غمی، عید مگر ہے تو سہی
لے گیا سیلِ بلا عید کی خوشیاں لیکن
اے غم در بہ دری، عید مگر ہے تو سہی
عید گاہوں سے بھی اس بار جنازے نکلے
جیتے جی مار گئی، عید مگر ہے تو سہی
فاضل جمیلی

__________________
جاویداسد