غزہ(اے این این)فلسطینی وزیر اعظم اسماعیل ھنیہ کا کہنا ہے کہ فلسطینی تنظیموں کے مابین مفاہمت آنا فانا نہیں بلکہ اس کے لیے فلسطینی قوم کی انتھک جدوجہد کا دخل ہے انہوں نے کہا کہ مفاہمت کے عمل میں شرکت سے معلوم ہوگیا ہے کہ قوم مسئلہ فلسطین، مقبوضہ بیت المقدس، مسجد اقصی اسلامی مقدسات کو لاحق خطرات سے باخبر ہے۔مرکز اطلاعات فلسطین کے مطابق اسماعیل ھنیہ نے جمعرات کے روز اپنے خطاب میں کہا کہ فلسطینی مفاہمت کی بنا پر فلسطینی حکومت کی تشکیل، سیاسی قیدیوں کی رہائی، سپریم سکیورٹی کونسل اور اعلی الیکشن کمیشن کا جلد ازجلد قیام لازم ہو گیا ہے۔ انہوں نے دو طرفہ اعتماد کی بحالی کے لیے سیاسی اختلافات کی پاداش میں گرفتار قیدیوں کی رہائی ضروری قرار دی اور کہا کہ غزہ میں کوئی سیاسی قیدی موجود نہیں۔ اس موقع پر اسماعیل ھنیہ نے غز ہ پر موجود مالیاتی دبا ختم کرنے کے لیے عرب بھائیوں سے فلسطینی قوم کو متبادل مالیاتی اور اقتصادی وسائل کی فراہمی کی اپیل بھی کی۔ان کا عرب اور اسلامی امت سے مطالبہ تھا کہ وہ فلسطینی مفاہمت میں مصر کے کردار کو سراہنے کے ساتھ ساتھ فلسطینی قوم اور شہدا کے خاندانوں کی مفاہمت اور عفو و درگذر کے رویے کو بھی خراج تحسین پیش کرے اور گھائل فلسطینیوں کے زخموں کو مندمل کرنے کی ترکیب کرے۔ غزہ میں حماس کے زیر انتظام حکومت کے وزیر اعظم نے یہ بھی کہا کہ مفاہمت سے فلسطینی قوم کے جذبے اور واضح اساس پر وحدت کی خاطر قربانیوں سے آگاہی ملتی ہے۔ انہوں نے کہا کہ خطے میں ہونے والی تمام تبدیلیاں فلسطینی قوم اور اس کے مستقبل کے لیے ہیں نا کہ اسرائیل کے لیے، انہوں نے واضح کیا کہ وہ اسرائیل کی دھمکیوں سے خوفزدہ نہیں اور قوم کی حفاظت کے لیے اسرائیل کے خلاف مزاحمت کے بنیادی موقف پر قائم رہینگے۔ حماس کے اعلی رہنما اور غزہ کے وزیر اعظم غزہ کے ظالمانہ محاصرے کو موضوع خطاب بناتے ہوئے کہا کہ یہ ناکہ بندی ختم ہورہی ہے اور اللہ کے فضل اور قوم کی مشترکہ کاوشوں سے ضرور ختم ہوجائے گی، انہوں نے کہا کہ اسرائیل نے ہمارے خلاف جنگ، سیاسی بندش اور اقتصادی بائیکاٹ پر مشتمل سہ جہتی منصوبہ بندی کر رکھی ہے۔اسماعیل ھنیہ نے زور دے کر کہا کہ ہمارے نزدیک تمام مزاحمتی اور سفارتی کوششوں میں فلسطینی قیدیوں کا معاملہ سب سے اولین حیثیت کا حامل ہے۔

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات