غزہ کی پٹی میں ہزاروں بچے دوبارہ اُن سکولوں میں جارہے ہیں، جنہیں فلسطینی علاقے میں حماس کے خلاف اسرائیل کے حملوں کے دوران بند کردیا گیا تھا۔

اقوامِ متحدہ کے زیرِ انتظام سکول خوں ریزی کی وجہ سے تقریباً ایک ماہ تک بند رہنے کے بعد ہفتےکے روز دوبارہ کھل گئے۔ان میں کئى سکولوں کو لڑائى کے دوران ضرورت مند لوگوں کے لیے پناہ گاہوں کے طور پر استعمال کیا گیا تھا اور کئى سکولوں پر اسرائیل نے گولا باری کی تھی۔

22 روز تک جاری رہنے والے اسرائیلی حملوں میں لگ بھگ 13سوفلسطینی ہلاک ہو گئے تھے۔ یہ حملے دونوں جانب سے فائر بندی کے اعلان کے بعد گذشتہ اتوار کو بند ہوئے تھے۔

اسی دوران حماس کا ایک وفد اُن ملکوں کا شکریہ ادا کرنے کے لیے خطّے کاایک دورہ شروع کررہا ہے، جن ملکوں نے لڑائى کے دوران فلسطینیوں کی حمایت کی تھی۔

شام کے سرکاری ذرائع ابلاغ نے کہا ہے کہ حماس کے جلا وطن رہنما خلاد مشعل نے شام کے صدر بشار الاسد سے ملاقات کی ہے اور یہ کہ مسٹر اسد نے اُنہیں غزہ میں فتح کی مبارک باد دی ہے۔

اسرائیلی عہد ے داروں کا کہنا ہے کہ حملوں کا مقصد پورا ہوگیا ہے، یعنی حماس پر کاری ضرب لگانا اور اُسے مستقبل میں اسرائیلی شہریوں پر راکٹوں کے حملوں سے باز رکھنا۔