غزہ پر اسرائیلی فوج کی بمباری جاری، سینئرفلسطینی رہنما شہید،5زخمی
مقبوضہ بیت المقدس(جنگ نیوز) غزہ میں اسرائیلی جارحانہ کارروائیاں جاری ہیں،تازہ فضائی حملے میں فلسطینی تنظیم کا ایک سینئر کارکن شہید اور پانچھ افراد زخمی ہوگئے ،شہید ہونے والے سینیئر کارکن ابراہیم ابو علبہ کا تعلق ڈیموکریٹک فرنٹ فار لبریشن آف فلسطین سے تھا۔ تفصیلات کے مطابق اسرائیلی فوج منگل کی صبح ایک بار پھر غزہ کی پٹی کے جنوبی علاقوں میں داخل ہو گئی۔عینی شاہدین کے مطابق شمالی غزہ میں بیت الیہ کے علاقے میں اسرائیلی طیاروں نے فلسطینی تنظیم کے سینئر رہنما کی گاڑی کو اس وقت نشانہ بنایا جب وہ اپنی گاڑی میں سوار ہوکر جاررہے تھے۔انہیں شدید زخمی حالت میں اسپتال منتقل کیا گیا تاہم وہ زخموں کی تاب نہ لاکر چل بسے۔فلسطینی سیکیورٹی حکام کے مطابق منگل کی علی الصبح اسرائیلی فورس ٹینکوں، گن شپ ہیلی کاپٹروں اور اسلحے کی مدد سے تسوفیم کراسنگ کے قریب حماس کے زیر قبضہ علاقے میں ڈیڑھ کلو میٹر تک اندر داخل ہو گئی۔قبل ازیں اسرائیل میں سابق امریکی صدر جمی کارٹر نے جنوبی اسرائیل میں اس مقام کا دورہ کیا جہاں فلسطینی مجاہدین نے دو اسرائیلیوں کو ہلاک کیا تھا۔

__________________