غزہ سٹی (جنگ نیوز) اسرائیلی فوج نے منگل کے روز غزہ پر وحشیانہ حملے کرکے حماس کے 13 کارکنوں سمیت 19 فلسطینیوں کو شہید اور 45 کو زخمی کردیا۔شہید ہونے والوں میں حماس کے سابق وزیرخارجہ محمود ظاہر کا بیٹا حسام بھی شامل ہے۔ اسرائیل کی ان ظالمانہ کارروائیوں پر حماس نے تین روزہ سوگ اور ایک دن کی عام ہڑتال کا اعلان کیا ہے۔اے ایف پی کے مطابق حماس اور اسرائیل کے اہلکاروں کے درمیان شدید فائرنگ کا تبادلہ ہوا۔ اسرائیل نے یہ حملے ایسے وقت میں کئے ہیں جب اسرائیلی اور فلسطینی رہنماؤں نے ایک دن قبل امن معاہدے پر بات چیت کی ہے۔فلسطینی صدر محمود عباس نے کہا ہے کہ امن عمل کی کوششوں کے موقع پرغزہ آپریشن کرکے فلسطینی عوام کا قتل عام کیا گیا ہے۔رملہ کے مغربی کنارے میں صحافیوں سے بات چیت کرتے ہوئے محمود عباس نے کہا کہ ہمارے لوگ اس طرح کی کارروائیوں پر خاموش نہیں بیٹھ سکتے۔ اس طرح کے قتل عام سے امن قائم نہیں ہوسکتا ہے۔اسرائیل نے کہا ہے کہ یہ غزہ سے اسرائیلیوں پر ہونے والے حملوں کا نتیجہ ہے۔امریکا میں ہونے والی امن کانفرنس سے لیکر اب تک کے مختصر وقت میں اسرائیل نے غزہ میں 115 فلسطینیوں کو شہید کردیا ہے۔دریں اثنائاسرائیلی خفیہ ایجنسی کے سربراہ نے کہا ہے کہ غزہ کے علاقوں میں گزشتہ دو سال کے دوران ایک ہزار فلسطینیوں کو قتل کیا جا چکا ہے۔