غیراعلانیہ سیاسی پابندیوں کے باعث ہزاروں کارکن گرفتار اور روپوش ہیں، مہاجر قومی موومنٹ



کراچی (پ ر) مہاجر قومی موومنٹ پر غیر اعلانیہ سیاسی پابندیاں عائد کرکے ہزاروں کارکنوں کو گرفتار اور روپوشی کی زندگی گزارنے پر مجبور کردیا گیا ہے۔ مہاجر قومی موومنٹ کے رکن ایڈہاک کمیٹی ندیم الاسلام نے عارضی بیت الحمزہ سے جاری کردہ بیان میں مہاجر رہنماؤں کی گرفتاریوں اور اغواء کی مذمت کرتے ہوئے کہا ہے کہ رکن ایڈہاک کمیٹی عاصم حسین اور ملیر سیکٹر کے ذمہ داران کی گرفتاری کے بعد 3/ جنوری کو سٹی کورٹ میں پیشی پر آئے ہوئے اورنگی ٹاؤن سیکٹر کے ذمہ دار کریم کو اغواء کے بعد غائب کردیا گیا ہے اور تمام تر رابطوں اور تلاش کے باوجود انتظامیہ مثبت جواب نہیں دے رہی ہے جس کے باعث ان کے اہل خانہ سخت ذہنی اذیت کا شکار ہیں انہوں نے کہا کہ حکومت نے سیاسی مصلحتوں کی خاطر ان تمام مظالم اور صورتحال پر خاموشی اختیار کر رکھی ہے اور مہاجر قومی موومنٹ سے وابستگی کو جرم بنادیا گیا ہے۔