مانٹریال ..... پاکستان میں آئندہ ماہ ہونے والے عام انتخابات میں حصہ لینے کے تقریباً 8کروڑ اہل ووٹرز کی ایک فہرست کینیڈا کی ایک کمپنی اپنے کمپیوٹرز میں محفوظ رکھ رہی ہے۔ کمپنی Cronomagic کے صدر حئی بخاری کے مطابق پاکستان الیکشن کمیشن نے ایک آن لائن ڈیٹا بیس بنانے کے حوالے سے یہ ذمہ داری انہیں دی ہے تا کہ بجلی کے تعطل اور دوسرے مسائل سے نبردآزما ہوئے بلا رکاوٹ کام کو جاری رکھا جائے۔ انہوں نے کہا کہ ایسا کرنا صرف اس صورت میں ممکن تھا جب یہ سارے اعداد و شمار امریکا، کینیڈا یا یورپ میں محفوط کئے جاتے۔27دسمبر کومحترمہ بینظیر بھٹو کے قتل کے بعدپیدا ہونے والی صورتحال کے نتیجے میں الیکشن کمیشن نے فیصلہ کیا تھا کہ اہل ووٹرز کی ایک فہرست اپنی ویب سائٹ پر جاری کی جائے تاکہ ہر شخص اپنی رجسٹریشن کے بارے میں جان سکے۔ حئی بخاری نے کہا کہ یہ سارے اعداد و شمار اردو زبان میں ہیں اور تمام سیاسی جماعتیں، بین الاقوامی الیکشن آبزورزاس سے استفادہ حاصل کر سکتے ہیں۔