فرقہ واریت پھیلانے والے سامراج کے ایجنٹ ہیں، سجاد سعید کاظمی



کراچی (پ ر) جماعت اہلسنت پاکستان کے مرکزی رہنما صاحبزادہ سید سجاد سعید شاہ کاظمی نے کہا ہے کہ دہشت گردی اور فرقہ واریت پھیلا کر وطن عزیز کو عدم استحکام کا شکار کرنے والے سامر اج کے ایجنٹ ہیں۔ اسلام دین فطرت ہے جو احترام انسانیت، رواداری اور اخوت کا درس دیتا ہے۔ انہوں نے ان خیالات کا اظہار مسجد دیار حبیب گلشن حدید میں ڈاکٹر سرفراز نعیمی شہید کی یاد میں شہید پاکستان کانفرنس سے خطاب کرتے ہوئے کیا۔ کانفرنس سے مرکزی جمعیت علمائے پاکستان کے مرکزی ڈپٹی سیکرٹری جنرل طارق محبوب، علامہ اکرم سعیدی،ر انا مرسلین نے بھی خطاب کیا جبکہ مفتی محمد رفیق درانی، پیر آفتاب جیلانی، نائب ناظم اشفاق احمد ایوبی،مولانا صادق سعیدی، مصطفائی اسٹوڈنٹس کے محمد امین قادری، محمد راحیل قادری بھی موجودتھے۔ علامہ ساجد سعید شاہ کاظمی نے مزید کہا کہ ڈاکٹر سرفرازنعیمی نے پاکستان کی سالمیت و استحکام کی خاطر جو قربانی دی ہے وہ ہماری قومی ملی و مذہبی تاریخ کا حصہ بن چکی ہے۔ طارق محبوب نے کہا کہ ڈاکٹر سرفراز نعیمی کی شہادت، دہشتگردی کی موت ہے اسلام کی مقدس تعلیمات کی آڑ میں دہشت گردی کے ذریعے اپنا ایجنڈا پاکستان پرمسلط کرنے اور معصوم لوگوں کو اپنے مفادات کی بھینٹ چڑھانے والے اسلام اور پاکستان کے غدار ہیں،ہم علماء و مشائخ کی قیادت میں پاکستان کی سالمیت، استحکام و بقاء کی جدوجہد جاری رکھیں گے۔

__________________