واشنگٹن ۔۔۔۔۔۔۔ امریکا میں پاکستانی سفیر محمود علی درانی نے کہا ہے کہ 18فروری مکمل طورپر اقتدار کی سویلین حکومت کی جانب منتقلی کا تاریخی دن ہوگا۔واشنگٹن کے بورڈ آف انڈسٹریز کو اپنے ایک انٹرویو میں انہوں نے کہا کہ پاکستان مسلم لیگ (ق) نے گزشتہ حکومت کے دور میں صدر مشرف کی حمایت کی تھی آئندہ بھی حکومت کے قیام کیلئے کسی بھی سیاسی جماعت کے ساتھ مل کر کام کرنے کو تیار ہیں۔ انہوں نے کہا کہ آئندہ سیٹ اپ میں جو بھی وزیراعظم ہو اسے کسی خفیہ ہاتھ سے کنٹرول نہیں کیا جانا چاہئے۔ انہوں نے کہا کہ 18فروری کے انتخابات صدر مشرف کی طرف سے قوم اور عالمی برادری کے ساتھ کئے گئے اقتدار کی منتقلی کے وعدوں کا حتمی مرحلہ ہو گا جس کیلئے صدر مشرف نے پہلے ہی وردی اتار دی ہے اور آئین کے تحت ملک کے صدر رہنے کی سپریم کورٹ نے بھی منظوری دے دی ہے۔ محمود علی درانی نے امریکی میڈیا کی طرف سے پاکستان اور صدر مشرف پر تنقید کو انتہائی افسوسناک قرار دیتے ہوئے کہا کہ تنقید صدر مشرف، پاکستان اور پاک امریکا تعلقات کیلئے مددگار نہیں ہے۔