فلپائن، آسیان ممالک کے وزرائے خارجہ کا اجلاس شروع

آسیان ممالک کے وزرائے خارجہ کا اجلاس فلپائن میں شروع ہو گیا ہے ۔ سنگاپور کاکہنا ہے کہ اجلاس میں خطے میں انسانی حقوق کمیشن کے قیام پر اتفاق رائے ہو گیا ہے ۔منیلا میں وزرائے خارجہ اجلاس کا افتتاح کرتے ہوئے فلپائن کی صدر گلوریا آریو نے چیلنجز کا مقابلہ کرنے کے لیے رکن ممالک کے مشترکہ محاذ کے قیام پر زور دیا ۔ان کا کہنا تھا کہ چین اور بھارت خطے میں مضبوط معاشی طاقت کے طور پر ابھر رہے ہیں جن سے نہ صرف سخت مقابلہ ہے بلکہ ان کے ساتھ تعاون بھی کرنا چاہیے ۔ادھر سنگاپور کے وزیر خارجہ George Yeo نے بتایا کہ آسیان وزرائے خارجہ تنظیم کی تاریخ میں پہلی بار تیار کیے گئے چارٹر میں انسانی حقوق کمیشن کے قیام کی تجویز پر متفق ہو گئے ہیں ۔اس سے قبل فلپائن سمیت کئی رکن ممالک نے کمیشن کے قیام کی مخالفت کی تھی۔ اجلاس میں پہلی بار تیار کیے گئے تنظیم کے چارٹر پر بات چیت کے بعد اسے حتمی شکل دی جائے گی جس کے تحت سال دو ہزار پندرہ تک مکمل معاشی اصلاحات کی منصوبہ بندی کی جائے گی ۔اس کے ساتھ انسداد دہشتگردی ،ایٹمی عدم پھیلاؤ کے معاہدے پر مؤثر عملدرآمد،قدرتی آفات سے نمٹنے کے لیے اقدامات اور غریب ممالک کی امداد سمیت دیگر امورپر بھی بات چیت کی جائے گی ۔آسیان ممالک کے وزرائے خارجہ نے علاقائی انسانی حقوق کمیشن کے قیام پر اتفاق کیاہے ۔منیلا سے موصولہ رپورٹ کے مطابق سنگاپور کے وزير خارجہ نے کہا ہے کہ آسیان اجلاس میں شرکت کرنے والے ملکوں کے وزرائے خارجہ علاقائی انسانی حقوق کمیشن کے قیام پر متفق ہوگئے ہیں ۔اس سے قبل فلپائن سمیت کئی رکن ممالک نے اس کمیشن کے قیام کی مخالفت کی تھی ۔واضح رہے کہ برونائی ، کمبوڈیا ، لاؤس ، انڈونیشیا ، میانمار ، فلپائن ، سنگاپور ، تھائی لینڈ اور ویت نام آسیان کے رکن ہیں ۔(30جولائي 2007)