صوبہ سرحد کی حکومت نے جنگ آزادی کے رہنماء خان عبدالغفار خان اور اے این پی کے مرحوم رہنماء خان عبدالولی خان کی برسی کے موقع پر روایات کے برعکس سرکاری محکموں میں دو گھنٹے اضافی کام کرنے کا فیصلہ کیا ہے۔

حکمران جماعت عوامی نیشنل پارٹی سے تعلق رکھنے والے صوبائی وزیر اطلاعات میاں افتخار حسین نے بی بی سی کو بتایا کہ پاکستان میں ہمیشہ سے یہ روایت رہی ہے کہ اقتدار میں آنے والی جماعت اپنے قائدین کی برسی کے موقع پر عام تعطیل کا اعلان کرتی ہے مگر انہوں نے اپنے رہنماؤں کی برسی کے موقع پر سرکاری دفاتر میں دو گھنٹے اضافی کام کرنے کا فیصلہ کرکے ایک نئی اور کام دوست روایت قائم کرنے کی کوشش کی ہے۔

انہوں نے کہا کہ باچا خان اور خان عبدالولی خان کی مشترکہ برسی اتوار کے روز پشاور سمیت پورے صوبے میں منائی جائے گی مگر سنیچر کو وزیر اعلی اور وزراء سمیت تمام سرکاری اداروں میں دو گھنٹے اضافی کام کیا جائے گا۔

جماعت اسلامی نے صوبائی حکومت کے اس فیصلے کو تنقید کا نشانہ بناتے ہوئے کہا ہے کہ کسی جماعت کی قائدین کی برسی کی کے موقع پر اس قسم کے فیصلے کا مقصد سرکاری اداروں میں مداخلت کے مترادف ہے۔تاہم میاں افتخار حسین کا کہنا ہے کہ انہوں نے کام کرنے کی ایک مثبت روایت قائم کی ہے لہذا اس کی حوصلہ شکنی کی بجائے حوصلہ افزائی ہونی چاہیے۔

عبدالحئی کاکڑ
بی بی سی اردو ڈاٹ کام، پشاور