سوات (ریڈیو رپورٹ/) پاکستان کے قبائلی علاقوں اورصوبہ سرحد میں مبینہ طور پر سرگرم طالبان کے مختلف گروپوں نے متحد ہو کر بیت اللہ محسود کی قیادت میں ”تحریک طالبان پاکستان“ کے نام سے ایک نئی تنظیم قائم کرنے کا دعویٰ کیا ہے۔ طالبان نے اعلان کیا ہے کہ آئندہ حکومت پاکستان کے ساتھ جنگ کرنے یا معاہدہ کرنے کا فیصلہ کسی ایک علاقے کی سطح پر نہیں بلکہ نئی تنظیم کے تحت متفقہ طور پر کیا جائیگا۔طالبان کمانڈر بیت اللہ محسود نے بی بی سی سے بات چیت کرتے ہوئے دعویٰ کیا ہے کہ جنوبی وزیرستان میں سات قبائلی ایجنسیوں جنوبی وشمالی وزبرستان، کرم باجوڑ، اورکزئی، خیبر اور مہمند ایجنسی کے علاوہ صوبہ سرحد کے مالاکنڈ ڈویژن کے بونیر، سوات، کوہستان اور درہ آدم خیل علاقوں سے تعلق رکھنے والے مختلف طالبان گروپس کے تقریباً بیس نمائندوں کا ایک اجلاس منعقد ہوا، جس میں ”تحریک طالبان پاکستان‘ کے نام سے ایک نئی تنظیم کا قیام عمل میں لایاگیا ہے۔ بیت اللہ محسود کے مطابق اجلاس کے دوران ایک چالیس رکنی شوریٰ بھی تشکیل دی گئی ہے، جس کا امیر بیت اللہ محسود اور ترجمان مولوی عمر کو منتخب کیاگیا ہے۔دریں اثناء سیکورٹی فورسز نے سرچ آپریشن کے دوران مولانا فضل اللہ کے اہم ساتھی مولوی بشیر سمیت 14 قبائلیوں کو گرفتار کرلیا ہے۔گرفتار افراد پولیس کی تحویل میں ہیں اور ان سے تفتیش کی جارہی ہے۔آرمی ہواء بازوں نے سیدو شریف ایئرپورٹ کو دوبارہ کھولنے کیلئے آزمائشی طور پر دو مشاق پروازیں کامیابی سے اتاریں۔ضلع بنوں اور لکی مروت کے درمیان کوٹ کشمیر کے مقام پر پولیس پوسٹ پر جمعہ کی شب رات کو نامعلوم افراد نے راکٹ فائر کیا جس سے پولیس پوسٹ کو معمولی نقصان پہنچا اور معراج نامی سپاہی زخمی ہو گیا

__________________