چار سال قبل ضلع شکارپور میں مہر برادری کے دو گرہوں کے درمیان معمولی بات پر پیدا ہونے والے تنازعہ میں چار افراد کے قتل کے بعد ہونے والی دشمنی ختم کرنے کے سلسلے میں ہونے والے جرگے میں قتل کے عوض بارہ لڑکیاں دینے کا فیصلہ کیا گیا ہے۔

دونوں خاندان ایک ہی برادری سے تعلق رکھتے ہیں۔ ان لوگوں کے درمیان جمعہ کے روز ضلع سکھر کے علاقے پنون عاقل کے ایک گاؤں رضا گوٹھ میں ایک جرگہ ہوا۔ جرگہ میں علاقے کے وڈیرے ابراہیم مہر نے فیصلہ دیا کہ چار قتل کے عوض پریل مہر اپنے گھر کی بارہ لڑکیوں کے رشتے الن مہر کو دیں گے۔

بی بی سی اردو ڈاٹ کام کے نامہ نگار کے مطابق ہلاک شدگان کا تعلق الن مہر کے گھرانے سے تھا۔ ایک قتل کے عوض تین رشتہ طے ہوئے جسے فریقین نے باہمی رضا مندی سے قبول کیا حالانکہ تمام لڑکیاں کم سن ہیں۔ کسی معاملے میں صلح کرانے کے لیے لڑکیوں کے رشتے دینے کو ونی کی رسم قرار دیا جاتا ہے۔

جب جرگہ کی خبر عام ہوئی تو پولیس حکام نے واقع کا نوٹس لیا۔ سکھر کے ڈسٹرکٹ افسر اعتزاز گورایا کے مطابق چونکہ یہ غیر قانونی فیصلہ ہے اس لیے پولس کو مداخلت کرنا پڑی ہے۔ ان کا کہنا تھا کہ مقدمہ کے اندراج کے بعد پولس جرگہ کرنے والوں کے خلاف کارروائی کرے گی۔ پولیس کے حرکت میں آنے کے بعد جرگہ کرنے والے لوگ غائب ہوگئے ہیں ۔ پنو عاقل کے بعض اخبار نویسوں کا کہنا ہے کہ ابراہیم مہر نے انہیں بتایا تھا کہ جرگہ نہیں کیا گیا ہے بلکہ یہ لوگ منت سماجت کرتے ان کے پاس صلح کے لیے آئے تھے اس لیے ان کے درمیان صلح کرا دی گئی۔

سکھر میں ہی ہائی کورٹ کی ایک سرکٹ بینچ نے سن دو ہزار پانچ میں ایک مقدمہ میں فیصلہ دیتے ہوئے کہا تھا کہ جرگہ کرنے پر پابندی عائد کی جاتی ہے اور قتل کے معاملے پر کسی قسم کا جرگہ نہیں ہوگا۔ اس فیصلے کے باوجود علاقے کے با اثر سیاسی لوگوں نے بار بار جرگے منعقد کیے اور قتل جیسے معاملات پر بھی فیصلے دیے اور قاتلوں پر جرمانے عائد کر کے ان کی جان بخشی کی گئی۔ بااثر لوگوں کی دیکھا دیکھی چھوٹے وڈیرے بھی جرگے کرنے لگے ہیں اور قتل کے معاملات پر فیصلے کیے جارہے ہیں۔

بی بی سی اردو

__________________

میرا بلاگ۔ صدائےقلندرhttp://saifikhan011.blogspot.com/