اردو کی معروف ناول نگار قرۃالعین حیدر طویل علالت کے بعد منگل کو دلی میں انتقال کر گئیں۔
ان کی عمر اسّی برس تھی۔

قرۃالعین حیدر کی بھانجی ہما حیدر حسن نے بی بی سی کو بتایا کہ وہ ایک طویل عرصے سے بیمار تھیں اور دلی کے نواحی شہر نوئیڈا کے کیلاش ہسپتال میں زیرِ علاج تھیں۔ان کے ایک خادم رفیع الحسن نے بی بی سی کو بتایا کہ ان کی تدفین منگل کی شام ساڑھے چار بجے جامعیہ ملیہ اسلامیہ کے قبرستان میں کی جائی گي۔

قرۃ العین حیدر جنہیں ادب کی دنیا اور ان کے گھر والے پیار سے’عینی آپا‘ کے نام پکارتے تھے 1927 میں اتر پردیش کے شہر علی گڑھ میں پیدا ہوئیں۔ تقسیم ہند کے بعد قرۃالعین حیدر کا خاندان پاکستان چلا گیا لیکن بعد میں انہوں نے ہندوستان آ کر رہنے کا فیصلہ کیا۔

قرۃالعین حیدر نہ صرف ناول نگاری بلکہ اپنے افساننوں اور بعض مشہور تصانیف کے ترجموں کے لیے بھی جانی جاتی ہیں۔ ان کے مشہور ناولوں میں’آگ کا دریا‘،’ آخرِ شب کے ہم سفر‘، ’میرے بھی صنم خانے‘، ’چاندنی بیگم‘ اور’ کارِ جہاں دراز‘ شامل ہیں۔

ان کے سبھی ناولوں اور کہانیوں میں تقسیم ہند کا درد صاف دکھتا ہے اوران کے دو ناولوں’آگ کا دریا‘ اور ’آخر شب کے ہم سفر‘ کو اردو ادب کا شاہکار مانا جاتا ہے۔

’آخرِ شب کے ہم سفر‘ کے لیے 1989 میں انہیں ہندوستان کے سب سے باوقار ادبی اعزاز گیان پیٹھ ایوارڈ سے بھی نوازا گیا جبکہ بھارتی حکومت نے انہیں1985 میں پدم شری اور 2005 میں پدم بھوشن جیسے اعزازات بھی دیے۔

11 سال کی عمر سے ہی کہانیاں لکھنے والی قرۃالعین حیدر کو اردو ادب کی’ورجینا وولف‘ کہا جاتا ہے۔ انہوں نے پہلی بار اردو ادب میں ’سٹریم آف کونشینئس‘ تکینک کا استعمال کیا تھا۔ اس تکنیک کے تحت کہانی ایک ہی وقت میں مختلف سمت میں چلتی ہے۔

قرۃ العین حیدر کے انتقال کو نہ صرف ہندوستانی ادب بلکہ تیسری دنیا کے ادب کے لیے ایک بڑا دھچکا مانا جا رہا ہے۔ ہندی ادب کے مشہور کہانی اور ناول نگار اصغر وجاہت نے بی بی سی کو بتایا ’قرۃ العین حیدر جدید اردو ادب کی لیجنڈ بن چکی تھیں اور ان کے جیسے لکھنے والے پورے برصغیر میں چند ہیں۔ ان کے انتقال سے نہ ہندوستانی ادب اور اردو ادب بلکہ تسیری دنیا کے ادب کو بھاری نقصان ہوا ہے۔ انھوں نے جدید کلاسک ناول کو کہانی بیان کرنے کا جو انداز بخشا تھا وہ نایاب ہے‘۔

__________________
تم سپاہی نہیں ہو پیشہ ور قاتلو!