اسلام آباد (طارق بٹ) آڈیٹر جنرل آف پاکستان (اے جی پی) کی وفاقی وزارتوں اور شعبوں کے اخراجات سے متعلق تازہ ترین رپورٹ سے پتہ چلتا ہے کہ قومی خزانے سے 35 ارب روپے خوردبرد کئے گئے یا بے قاعدگی سے خرچ کئے گئے یا پھر اس رقم کا سرکاری ریکارڈ ہی غائب ہے؎
اور سابق وفاقی وزیر قانون بابر اعوان نے اربوں روپے بلااختیار بار کونسلز کو دے دیئے۔ 2010-11 کی رپورٹ کی ایک کاپی دی نیوز کے پاس موجود ہے۔
آڈیٹر جنرل کی رپورٹ کے بعد وزیراعظم سیکرٹریٹ نے ”چیریٹیز اینڈ پریذنٹس“ اکاؤنٹ کے تحت ملازمین کو ناشتہ کرانے، دوپہر کا کھانا کھلانے، ضیافت کرانے اور چائے پلانے سے روک دیا گیا۔ اس طرح کے اخراجات کیلئے الگ اکاؤنٹ بنا دیا گیا۔
اہم بات یہ ہے کہ آڈیٹر جنرل آف پاکستان نے بابر اعوان کی طرف سے پاکستان بھر کی وکلاء کی ایسوسی ایشنز کو23 کروڑ 64لاکھ سے زائد رقم کی بلااختیار ادائیگی پر اعتراض کیا ہے۔
رپورٹ میں وزارتوں اور محکموں پر زور دیا گیا ہے کہ وہ فضول خرچی اور نقصانات کی ذمہ داری کے تعین کیلئے تحقیقات کرائیں۔ رپورٹ میں 11 کیسز ایسے ہیں جن میں 2 ارب 40 کروڑ 77 لاکھ سے زیادہ کا غبن کیا گیا ہے، 27 کیسز میں رقم کے بے قاعدہ خرچ یا ادائیگیوں اور قوانین کی خلاف ورزی کی گئی ہے اور ان کیسز میں 6 ارب 9 کروڑ 86 لاکھ روپے خوردبرد کئے گئے ہیں۔
رپورٹ میں 3 مثالیں ایسی بھی ہیں جن کا ریکارڈ بھی موجود نہیں اور غبن کی رقم ایک ارب 35 کروڑ 9 لاکھ روپے ہے۔
رپورٹ میں کہا گیا ہے 17 کیسز ایسے ہیں جن میں مالی کنٹرول کمزور ہے اور ان میں 9 ارب 53 کروڑ 82 لاکھ روپے کی ہیراپھیری کی گئی ہے۔ مزید 38 کیسز ایسے ہیں جن میں مالی اور کمزور ہیں اور 11 ارب 94 کروڑ 96 لاکھ روپے کا غبن کیا گیا ہے اور 6 کیسز میں اثاثوں کے انتظامات غیر محفوظ ہیں اور ان میں خوردبرد کی رقم ایک ارب 34 کروڑ 25 لاکھ ہے۔
رپورٹ میں کہا گیا ہے کہ وفاقی وزارتوں اور محکموں کو آرٹیکل 78 پرسختی سے عمل درآمد کرنا چاہئے۔ وہ عوامی رقم وصول یا خرچ کریں۔ ان کوعوامی رقم ”فیڈرل کونسولیڈیٹڈ فنڈ“ اور پبلک اکاؤنٹس میں رکھنی چاہئے۔ کمرشل بینکوں میں رقم رکھنے سے سختی سے منع کیا گیا ہے کیونکہ یہ اصول کی خلاف ورزی ہے۔ تاہم رپورٹ میں کہا گیا ہے کہ آڈیٹر جنرل آف پاکستان کو مہیا کئے گئے موجودہ ریکارڈ کی تصدیق جاری ہے۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں