قومی مفاہمت اور دہشت گردی ساتھ ساتھ نہیں چل سکتے، طارق محبوب
کراچی (پ ر) مرکزی جمعیت علماء پاکستان کے مرکزی ڈپٹی سیکریٹری جنرل طارق محبوب نے کہا ہے کہ قومی مفاہمت کا عمل اور سیاسی دہشت گردی ساتھ ساتھ نہیں چل سکتی۔ وہ مختلف وفود سے بات چیت کررہے تھے۔ اس موقع پر اے این آئی کراچی سٹی کے صدر سید ارشد عقیل، مبشر قادری، کاشف اطہر ایڈووکیٹ، مبشر احمد ایڈووکیٹ و دیگر رہنما بھی موجود تھے۔ طارق محبوب نے کہا کہ جمہوری حکومتوں کے قیام کے ساتھ ہی غیر جمہوری قوتوں نے سازشیں شروع کردی ہیں۔ ڈاکٹر ارباب رحیم اور ڈاکٹر شیرافگن پر حملے سابق حکمران جماعت اور آمریت پسند قوتوں کی جمہوری نظام کو آغاز ہی میں ناکام بنانے کی سازش تھی لیکن وکلاء سول سوسائٹی اور قوم کے اتحاد نے ان کے عزائم کو ناکام بنادیا ہے۔ قوم جس جمہوری سفر پر گامزن ہے وہ پاکستان کے مستقبل اور جمہوریت کیلئے انتہائی خوش آئند ہے۔ انہوں نے کہا کہ پی پی پی کی قیادت کی طرف سے ایوان صدر اور ججز کی بحالی کے ایشو پر واضح موٴقف اختیار نہ کئے جانے پر جمہوری و عوامی حلقوں میں تشویش پائی جاتی ہے۔ انہوں نے نواز شریف کے جرات مندانہ موٴقف کو زبردست خراج تحسین پیش کرتے ہوئے کہا کہ میاں نواز شریف پاکستان کے استحکام، جمہوریت کی بقاء اور آئین کی بحالی و بالادستی کیلئے ذاتی مفادات سے بالاتر ہو کر جو جدوجہد کررہے ہیں پوری قوم کو اس پر فخر ہے۔

__________________