اسلام آباد (جنگ نیوز) چیف آف آرمی اسٹاف جنرل اشفاق پرویز کیانی نے کہا ہے کہ قوم نے فوج کو ملکی دفاع کی اہم ذمہ داری سونپ رکھی ہے اور قومی کوششوں میں فوج کے لیے قوم کی حمایت انتہائی ناگزیر ہے۔ ان خیالات کا اظہار انہوں نے آرمی چیف کا عہدہ سنبھالنے کے بعد ہفتہ کو پہلی بار لائن آف کنٹرول کے دورے کے موقع پر فوجی جوانوں سے خطاب کرتے ہوئے کیا۔انہوں نے کہا کہ فوج مادر وطن کے دفاع کیلئے کسی قربانی سے گریز نہیں کریگی تاہم قومی کوششوں کوآگے بڑھانے میں قوم کی حمایت بہت ضروری ہے۔اس دوران انہوں نے لائن آف کنٹرول پر مورچوں کا دورہ کیا اور مختلف مقامات پر تعینات فوجی جوانوں سے ملے۔ اس موقع پر کور کمانڈر لیفٹیننٹ جنرل محسن کمال بھی انکے ہمراہ تھے۔عسکری ذرائع کے مطابق آرمی چیف نے فوجی جوانوں کی فلاح و بہبود کے اقدامات کا بھی ذکرکیا اور کہا کہ فوج کی ترقی اور بہتری کیلئے وہ اپنا کردار اداکرتے رہیں گے ۔ قبل ازیں پاک فوج کے سربراہ جنرل اشفاق پرویز کیانی نے کور ہیڈ کوارٹرزچکلالہ کادورہ کیا۔ہیڈ کوارٹرز پہنچنے پر کور کمانڈر راولپنڈی لیفٹیننٹ جنرل محسن کمال نے چیف آف آرمی اسٹاف کا استقبال کیا اور ان کا کور کے اسٹاف افسران سے تعارف کرایا اور آپریشنل تیاریوں سے متعلق تفصیلی بریفنگ دی۔

__________________