پاکستان اور بھارت نے اسلام آباد میں جاری جامع مذاکرات کے چوتھے مرحلے کے بعد ایک دوسرے کے قیدیوں کی شناخت کے بعد ان کی فوری رہائی میں مدد دینے کے لیے سفارتی رسائی کے معاہدے پر دستخط کر دیے ہیں۔
پاکستان اور بھارت کے مابین جامع مذاکرات کے سلسلے میں بھارتی وزیرخارجہ پرنب مکھرجی گزشتہ روز اسلام آباد پہنچے تھے اور آج انہوں نے مذاکرات کے چوتھے مرحلے میں پاکستانی وزیرخارجہ شاہ محمود قریشی سے ملاقات کی۔

پاکستان اور بھارت کی جانب سے دونوں ممالک کے ہائی کمشنرز نے اس معاہدے پر دستخط کیے۔ اس تقریب میں دونوں ممالک کے وزرائے خارجہ نے بھی شرکت کی۔

بھارتی وزیر خارجہ کی پاکستان آمد کے موقع پر منگل کو پاکستان حکومت نے جذبہ خیر سگالی کے تحت ننانوے بھارتی قیدیوں کو رہا کرنے کا اعلان کیا تھا۔مبصرین کے خیال میں دونوں ممالک کے درمیان قیدیوں سے متعلق معاہدے سے ایک دوسرے کے ہاں برس ہا برس سے قید شہریوں کی جلد رہائی ممکن ہوسکے گی۔

مذاکرات کے چوتھے دور کے بعد پریس کانفرنس سے خطاب کرتے ہوئے پاکستان کے وزیرِ خارجہ شاہ محمود قریشی نے بتایا کہ پاکستان اور بھارت کے درمیان جامع مذاکرات کا پانچواں دور جولائی میں ہو گا جبکہ بھارتی وزیراعظم اسی برس پاکستان کا دورہ بھی کریں گے۔
ان کا کہنا تھا کہ دونوں ممالک چاہتے ہیں کہ منموہن سنگھ کے دورے سے قبل کچھ اہم مسائل پر ہم آہنگی ہو جائے تاکہ بھارتی وزیراعظم کا دورہ مثبت نتائج کا حامل ہو سکے۔ انہوں نے یہ بھی بتایا کہ وہ خود جون میں بھارت کا دورہ کریں گے۔

کشمیر کے حوالے سے سوال پر پاکستانی وزیرِ خارجہ نے بتایا کہ بات چیت میں کشمیر سمیت کچھ ایشوز پر زیادہ پیشرفت نہیں ہو سکی تاہم دونوں ممالک نے تمام مسائل کے حل کے لیے بات چیت کا عمل جاری رکھنے پر اتفاق کیا ہے۔

یاد رہے کہ گزشتہ روز دونوں ملکوں کے مابین خارجہ سیکرٹریوں کی سطح پر بات چیت ہوئی تھی جس کے بعد دونوں ممالک کے قیدیوں کی شناخت کے بعد ان کی فوری رہائی میں مدد دینے کے لیے سفارتی رسائی کے معاہدے کو حتمی شکل دے دی گئی تھی۔

واضح رہے کہ جنوری سن دو ہزار چار سے پاکستان اور بھارت نے جن آٹھ نکات پر چار مراحل میں بات چیت کی ہے ان میں امن و سلامتی بشمول اعتماد سازی کے اقدامات، جموں و کشمیر، سیاچن، سر کریک، وولر بیراج یا تُل بُل ، دہشت گردی اور منشیات، اقتصادی تعاون اور دوستانہ تبادلوں کا فروغ شامل ہیں۔

ادھر بھارت کے وزیر خارجہ پرنب مکھرجی نے مذاکرات سے قبل پاکستان کے وزیراعظم یوسف رضا گیلانی سے بھی ملاقات کی۔

حالیہ پاک بھارت مذاکرات ایک ایسے وقت میں ہوئے ہیں جب ہندوستان کے زیرانتظام کشمیر میں کنٹرول لائن کے قریب ضلع پونچھ کے منڈھر سیکڑ میں فائرنگ کے ایک واقعے میں ہندوستانی فوج کا ایک جوان ہلاک اور چھ زخمی ہوئے ہیں اور بھارتی فوج نے الزام عائد کیا ہے کہ پاکستان نے دس روز میں دوسری مرتبہ چار سالہ فائر بندی معاہدہ کی خلاف ورزی کی ہے۔

اس سے قبل بھارت کے شہر جے پور میں یکے بعد دیگرے متعدد بم دھماکے بھی ہوئے تھے جس پر بھارتی وزیر اعظم من موہن سنگھ نے اپنے رد عمل میں کہا تھا کہ اس کا مقصد پاک بھارت تعلقات کو نقصان پہنچانا تھا۔ ان کے مطابق دونوں ممالک کو چاہیے کہ وہ ایسے مقاصد رکھنے والے عناصر کی کوششوں کو ناکام بنا دیں۔

__________________