قیدی خواتین اور بچّوں پر خصوصی توجہ دی جائے، توقیر فاطمہ بھٹو
کراچی (اسٹاف رپورٹر) جیل میں موجود خواتین اور بچوں کی تکنیکی تعلیم پر خصوصی توجہ دی جائے تاکہ رہائی کے بعد وہ معاشرے میں باعزت روزگار اور مقام حاصل کرسکیں۔ یہ بات صوبائی وزیر ترقی نسواں توقیر فاطمہ بھٹو نے منگل کو یہاں بچوں اور خواتین کی جیل کے دورے کے موقع پر جیل سپرنٹنڈنٹس یونس میمی اور شیبا شاہ سے گفتگو کرتے ہوئے کہی۔ انہوں نے جیل میں کمپیوٹر اور لائٹ انجینئرنگ کے شعبوں کو بھی فعال کرنے کی ضرورت پر زور دیا۔ اس موقع پر جیل سپرنٹنڈنٹ نے صوبائی وزیر ترقی نسواں کو بچوں کی جیل میں موجود سہولتوں کے بارے میں بتاتے ہوئے کہا کہ بچوں کو جیل میں دینی اور دنیاوی تعلیم کے ساتھ ساتھ ہنر بھی سکھائے جاتے ہیں جب کہ جیل میں پانچ وقت کی نماز کی بھی سختی سے پابندی کی جاتی ہے اور بچوں کے لئے شام میں کھیل کود کے لئے پارک میں بھی جانے کا انتظام ہوتا ہے۔ بعدازاں صوبائی وزیر نے خواتین کی جیل کا بھی دورہ کیا۔ اس موقع پر جیل سپرنٹنڈنٹ شیبا شاہ نے جیل کے بارے میں بریفنگ دیتے ہوئے بتایا کہ اس وقت خواتین جیل میں72 پاکستانی 466 غیرملکی خواتین اور ان کے ساتھ 20 بچے بھی قید ہیں۔ غیرملکی خواتین میں زیادہ تر منشیات کے کیس میں قید ہیں۔ صوبائی وزیر نے جیل سپرنٹنڈنٹ کی کارکردگی کو سراہتے ہوئے اسے مزید بہتر بنانے کی ہدایات دیں۔

__________________