کراچی (اسٹاف رپورٹر) سینیٹ میں قائد حزب اختلاف میاں رضا ربانی نے کہا ہے کہ پاکستان مسلم لیگ (ق) آگ سے کھیل رہی ہے۔ وفاق کو نقصان پہنچا رہی اور قوم کو صوبائی اور لسانی بنیادوں پر تقسیم کررہی ہے۔ اس کو اس بات کا اندازہ کرلینا چاہئے کہ صوبائیت کا جن بوتل سے باہر آگیا تواسے دوبارہ بند کرنا ناممکن ہے۔ اپنے بیان میں انہوں نے کہا کہ پی ایم ایل (ق) کا ایجنڈا وہی ہے جو ضیاء الحق کا تھا کہ قوم کو صوبائی بنیادوں پر تقسیم کرو۔ انہوں نے کہا کہ یہ رجحان نہ صرف انتہائی خطرناک بلکہ تباہی کے مترادف ہے۔ انہوں نے کہا کہ اندرونی اور بیرونی قوتیں پاکستان کو نقصان پہنچانا چاہتی ہیں۔ محترمہ بینظیر بھٹو کی شہادت وفاق کو نقصان پہنچانے کیلئے ہے اس لئے ہمیں چاہئے اس موقع پر اتحاد اور اتفاق کو برقرار رکھیں۔