واشنگٹن (نیر زیدی/نمائندہ جنگ) سابق وزیراعظم بینظیربھٹو کاخیال ہے کہ 8 جنوری کے الیکشن میں پاکستان مسلم لیگ (ق) کو جتوایا جائے گا لیکن وزیراعظم پاکستان پیپلزپارٹی سے بنانے کی کوشش کی جائے گی لیکن وہ اس اسکیم میں حصہ لینے کیلئے تیار نہیں ہیں۔ بینظیر بھٹو نے یہ بات واشنگٹن پوسٹ سے ایک انٹرویو کے دوران کہی۔بینظیر بھٹو کے مطابق اس چال کا مقصد یہ بتانا ہوگا کہ دیکھو ہم نے الیکشن کرایا ہے اور ملک کی سب سے مقبول پارٹی بھی ہمارے ساتھ ہے لہٰذا اب ہمیں سیاسی جواز حاصل ہوگیا ہے۔ بینظیربھٹو نے انکشاف کیا کہ پنجاب میں قومی اسمبلی کی 148 سیٹیں ہیں اور بقول ان کے حکومت نے ہدایت کی ہے کہ 108 سیٹیں سرکاری پارٹی کو دے دی جائیں چنانچہ باقی جماعتیں صرف 40 سیٹوں پر مقابلہ کررہی ہوں گی۔ جب ان سے پوچھا گیا کہ اس کا مطلب یہ ہے کہ حکومتی پارٹی پنجاب میں جیت جائے گی تو انہوں نے کہا کہ ”یہ لوگ نہیں جیتیں گے‘ ہم انہیں ہرادیں گے“ بینظیربھٹو نے کہا کہ سابق وزیراعظم میاں نوازشریف الیکشن میں حصہ لیکر ایک انتہائی مثبت کردار ادا کررہے ہیں لیکن بدقسمتی سے انہیں الیکشن لڑنے نہیں دیا جارہا ہے۔ بینظیربھٹو نے کہا کہ انہوں نے میاں نوازشریف کو سمجھایا تھاکہ اگر مقابلہ نہ کیا گیا تو بغیر کسی دھاندلی کے سرکاری پارٹی بھاری اکثریت سے کامیاب ہوجائے گی۔ جب ان سے پوچھا گیا کہ کیا صدر مشرف نے امریکیوں کو یقین دلایا ہے کہ انتخاب آزادانہ اور شفاف ہوں گے تو بینظیر بھٹو نے کہا کہ اس سوال کا جواب امریکی ہی دے سکتے ہیں۔ بینظیربھٹو نے کہا کہ وہ یہ دیکھ کر ششدر رہ گئی ہیں کہ انتہا پسندوں کی حمایت کتنی منظم ہے‘ کسی علاقے میں آرمی کمک مانگتی ہے لیکن کمک نہیں پہنچتی چنانچہ آرمی کو پسپا ہونا پڑتا ہے‘ سوال یہ ہے کہ کمک کیوں نہیں بھیجی جاسکتی۔ آرمی کے حوصلے پست ہیں کیونکہ عوام ان کے ساتھ نہیں ہیں۔ بینظیر بھٹو نے کہا کہ عوام کہتے ہیں کہ ”تم امریکا کی جنگ لڑرہے ہو“ لیکن بقول بینظیر بھٹو کے ”ہم امریکا کے علاقوں کیلئے بلکہ پاکستانی علاقوں کیلئے لڑرہے ہیں۔“

__________________