(ق) لیگ کے متعدد اراکین اسمبلی (ن) لیگ میں شمولیت پر تیار
اسلام آباد (عمر چیمہ) صدارت کی چھتری تلے 7 سال تک محفوظ بقاء کے بعد (ق) لیگ تیزی سے اپنی منطقی موت کی جانب بڑھ رہی ہے اور اس کے سینئر ارکان نے اپنی اعلیٰ قیادت کو اپنی خالق جماعت مسلم لیگ (ن) کے ساتھ انضمام کی تجاویز دینے شروع کر دیئے ہیں جبکہ دوسری جانب تباہ شدہ کنگ پارٹی (ق) لیگ میں اندرونی راستے بنانے کی کوششیں کرتے ہوئے میاں نواز شریف نے (ق) لیگ کے متعدد ارکان قومی اسمبلی کو ان کی کامیابی پر مبارک باد دینے کیلئے ذاتی طور پر فون کالز کی ہیں۔ (ق) لیگ کے منتخب شدہ بعض ارکان اسمبلی نے نمائندے کو بتایا ہے کہ وہ بعدازاں کسی بھی مرحلے پر مسلم لیگ (ن) میں شامل ہو سکتے ہیں۔ ان ارکان قومی اسمبلی کا کہنا تھا کہ نہ تو (ق) لیگ کوئی پارٹی ہے اور نہ ہی انہیں پارٹی کی بنیاد پر ووٹ دیئے گئے ہیں۔ (ق) لیگ میں کوئی ایسی شخصیت نہیں جو اس سیاسی جماعت کو متحد رکھنے کیلئے بندھن کا کام دے سکے۔ نواز شریف سے اپنی کامیابی پر مبارک باد وصول کرنے والے (ق) لیگ کے ایک اہم رہنما نے ”دی نیوز“ کو بتایا کہ مسلم لیگ (ق) لوگوں کا ہجوم ہے جہاں پر سب لوگ لیڈر ہیں، ورکر کوئی نہیں۔ دلچسپ امر یہ ہے کہ پارٹی بدل کر (ن) لیگ میں متوقع شمولیت اختیار کرنے والے ارکان قومی اسمبلی کی اکثریت کبھی بھی مسلم لیگ (ن) میں شامل نہیں رہی۔ سرگودھا، ملتان اور فیصل آباد ڈویژن وہ علاقے ہیں جہاں ارکان قومی اسمبلی کو پھانسا جا سکتا ہے کیونکہ ان علاقوں سے (ق) لیگ کے تقریباً 20 ایم این اے منتخب ہوئے ہیں۔ باوثوق ذرائع سے یہ بھی پتہ چلا ہے کہ سرگودھا ڈویژن سے کامیاب ہونے والے متعدد آزاد اراکین قومی و صوبائی اسمبلی نے پاکستان مسلم لیگ (ن) میں شامل ہونے کی خواہش کا اظہار کردیا ہے۔ جہاں تک (ق) لیگ کے مسلم لیگ (ن) میں ضم ہونے کا تعلق ہے تو اس مسئلے پر پارٹی کے سیکرٹری جنرل مشاہد حسین سید کی رہائش گاہ پر ہونے والے اجلاس میں بحث ہو چکی ہے۔

__________________