لانگ مارچ میں لاکھوں افراد شریک ہوئے،ملکی اور غیر ملکی میڈیا
اسلام آباد( ٹی وی رپورٹ) غیر ملکی میڈیا کے مطابق گزشتہ شب اسلام آباد میں وکیلوں کے جلسہ میں لاکھوں افراد نے شرکت کی ، غیر ملکی خبر ایجنسی اے ایف پی کا کہنا ہے کہ سابق وزیراعظم نواز شریف نے معزول چیف جسٹس کی بحالی کیلئے لاکھوں افراد کے مجمع سے خطاب کیا ، تقریباً 30 ہزار افراد ایک ریلی کی صورت میں اسلام آباد میں داخل ہوئے اے پی کے مطابق اسلام آباد کے اس جلسہ میں لاکھوں افراد نے گرمی اور حبس کے باوجود حصہ لیا۔ نیویارک ٹائمز نے کہا ہے کہ جمعہ کی رات ہزاروں افراد نے جن میں وکلا بھی شامل تھے معزول چیف جسٹس کی بحالی کیلئے جلسہ کیا اس مجمع میں عورتیں اور بچے بھی موجود تھے۔ واشنگٹن پوسٹ نے اس جلسہ میں شرکت کرنے والوں کی تعداد لاکھوں میں بیان کی ہے اور اسے عوامی طاقت کا بے مثال مظاہرہ قرار دیا ہے ۔ خبر ایجنسی رائٹر کے مطابق نواز شریف نے ایوان صدر کے قریب لاکھوں افراد سے خطاب کیا۔ دوسری طرف بی بی سی نے لانگ مارچ سے متعلق پاکستان کے اہم ترین اور بڑے اخبارات کے حوالے سے بتایا ہے کہ لانگ مارچ کے اختتام پر جلسہ میں شرکت کرنے والوں کی تعداد لاکھوں میں تھی۔بی بی سی کے مطابق جلوس اور لانگ مارچ کو پاکستانی اخبارات نے نمایاں کوریج دی۔ پاکستانی اور بھارتی ٹی وی چینلز نے بھی لانگ مارچ کے جلوس اور جلسے کے حوالے سے براہ راست کوریج دی اپنے لائیو تبصروں میں تبصرہ نگاروں نے جلوس اور جلسے کے حوالے سے اسے ٹھاٹھیں مارتا ہوا سمندر قرار دیا جبکہ بعض کا خیال تھا کہ ایسے مناظر اسلام آباد میں پہلے کبھی نہیں دیکھے گئے کسی تبصرہ نگار کا کہنا تھا کہ عوام کا سیلاب امڈ آیا ہے۔ پاکستانی سیاستدانوں نے بھی جلسے کے شرکاء کے حوالے سے دعویٰ کیا ہے کہ انکی تعداد 4سے5لاکھ کے درمیان تھی۔

__________________