لاڑکانہ: مختلف وفود کی نوڈیرو میں آصف زرداری سے تعزیت



لاڑکانہ(بیورورپورٹ) بے نظیر بھٹو کی تعزیت کا سلسلہ نویں روز بھی جاری رہا اور آج بھی دور دراز علاقوں سے متعدد وفود نے نوڈیرو پہنچ کر آصف زرداری سے تعزیت کی اور بعدازاں بے نظیر بھٹو کے مزار پر بھی حاضری دی۔جمعہ کی صبح ساوٴتھ ایشین فری میڈیا ایسوسئیشن (سیفما)کے پندرہ رکنی وفد نے نودیرو پہنچ کر آصف زرداری سے اظہار تعزیت کیا۔ بیرسٹر اعتزاز احسن کی اہلیہ بشریٰ اعتزاز نے بھی نودیرو میں آصف زرداری سے تعزیت کی۔سیفما کے وفد کی سربراہی امتیاز عالم کررہے تھے جبکہ اراکین میں نجم سیٹھی،مستنصر جاوید،ڈاکٹر جبار خٹک،اقبال ملاح،مس صدف ارشد،احمد رشید اور دیگر شامل تھے۔پیپلزلائرزفورم صوبہ سرحد کے وفد نے بھی آصف زرداری سے تعزیت کا اظہار کیا۔وفد میں بیرسٹر مسعود کھوسو اور سرحد کے سابق گورنر جنرل (ر) انعام اللہ شامل تھے۔پی پی پی کی ملتان سے قومی اسمبلی کے لئے نامزد امیدوار نسیم چوہدری نے بھی آصف زرداری سے اظہار تعزیت کیا۔دریں اثناء نویں روز بھی گڑھی خدا بخش بھٹو میں بے نظیر بھٹو کے مزار پر آنے والوں کا تانتا بندھا رہا اور تمام افراد نے پی پی پی کی چےئرپرسن محترمہ بینظیر بھٹو شہید کے مزار پر پھول چڑھائے اور فاتحہ خوانی کی۔ آج بھی متعدد خواتین بے نظیر بھٹو کی قبر سے لپٹ کر روتی رہیں اور بین کرتی رہیں۔جمعہ کو عام طور پر سندھ کے بیشتر علاقوں میں کاروبار بندرہتا ہے اس وجہ سے تجارتی اور کاروباری برادری نے جمعہ کو آصف زرداری سے اظہار تعزیت کیا اور بے نظیر بھٹو کے مزار پر حاضری دی۔لاڑکانہ کے رکشہ ڈرائیوروں نے ایک بڑی رکشہ ریلی نکالی اور نودیرو پہنچنے کے بعد گڑھی خدا بخش پہنچ کر بے نظیر بھٹو کے مزار پر حاضری دی اور فاتحہ خوانی کی۔اس موقعہ پر انہوں نے پی پی اور بے نظیر بھٹو کی حمایت میں نعرے بھی لگائے۔