جماعت اسلامی پاکستان کے ارکان اور امیدواران کا اجتماع اختتام پذیر ہو گیا۔ بعدازاں قاضی حسین احمد اور دیگر قائدین کی سربراہی میں اجتماع کے ہزاروں شرکاء ہاتھوں میں جماعت کے جھنڈے پکڑ کر ملتان روڈ پر آ گئے زبردست احتجاج کیا اور تقریباً ڈیڑھ گھنٹے تک ملتان روڈ کو بلاک کئے رکھا جس سے میلوں تک ٹریفک جام ہو گئی۔ قبل ازیں اجتماع سے اختتامی خطاب کرتے ہوئے قاضی حسین احمد نے کہا کہ شہادت ہماری منزل ہے ہمیں بموں اور دھماکوں سے ڈرایا نہیں جا سکتا موجودہ حکومت اپنے آقا امریکا کو خوش کرنے کے لئے ہرحربہ استعمال کر رہی ہے عدلیہ پر شب خون مار کر سپریم کورٹ کا مذاق اڑایا گیا ہے ہم دستور کی بالادستی پر یقین رکھتے ہیں اور اب بھی چیف جسٹس افتخار احمد چوہدری کو مانتے ہیں اور ان جج صاحبان کو خراج تحسین پیش کرتے ہیں جنہوں نے پی سی او کے تحت حلف اٹھانے سے انکار کر دیا۔انہوں نے کہا کہ ہم اللہ کے دین کی سربلندی کے لئے ہر وقت کمربستہ ہیں، ہمیں دوسروں کی ڈکٹیشن کی ضرورت نہیں پڑتی ہم اللہ اور رسول کے راستوں پر چلتے ہیں انہوں نے کہاکہ ہمارے حکمران امریکی ایجنڈے پر کام کر رہے ہیں جس کے لئے وہ ملکی سالمیت کو بھی داؤپر لگا رہے ہیں۔ دریں اثنا قاضی حسین احمد نے پیر کے روز ملک بھر میں ایمرجنسی کے خلاف احتجاج کا بھی اعلان کیا اور جماعت اسلامی کے ارکان کو ہدایت کی کہ ہر ضلع اور تحصیل ہیڈکوارٹر پر احتجاجی مظاہرے کریں اور جماعت اسلامی کے ارکان خود کارکنوں کی قیادت کریں۔ قاضی حسین احمد نے کہا کہ میں پیر کے روز سے ظلم کے خلاف تحریک شروع کرنے کا اعلان کرتا ہوں۔ انہوں نے کہا کہ جماعت اسلامی کے تمام ارکان و کارکنان نماز فجر کے وقت قنوت نازلہ کا ورد کریں وہ یہ اعلان متحدہ مجلس عمل کے پلیٹ فارم سے بھی کرائیں گے۔ قاضی حسین احمد نے کہا کہ چیف جسٹس افتخار محمد چوہدری اور پی سی او کے تحت حلف نہ اٹھانے والے دیگر جج قوم کے ہیرو ہیں کارکن انہیں گھروں پر جا کر پھول پیش کریں۔

__________________