کراچی ( جنگ نیوز) جیو ٹی وی کے چینلز اور ججوں کی بحالی کے لئے لاہور میں طلبا اور سول سوسائٹی کے افراد نے مال روڈ پر ناصر باغ سے احتجاجی ریلی نکالی جو مسجد شہدا سے ہوتے ہوئے انارکلی تک پہنچی ،ناصر باغ سے شروع ہو نے والے احتجاجی مظا ہرے میں طلبہ اور سول سوسائٹی کے ارکان کے علاوہ وکلاء بھی شریک تھے ۔مظا ہرین نے پلے کارڈ اٹھا رکھے تھے جن پر عدلیہ کی آزادی، ججوں کی بحالی اور اور میڈیا کے حق میں نعرے درج تھے۔ مظاہرے کے شرکا نعرے بازی کرتے ہوئے پنجاب یونیورسٹی سے ہو تے ہوئے انا ر کلی چوک تک پہنچ گئے جہاں انہوں نے کچھ دیر نعرے بازی کی اور اسکے بعد ہاتھوں کی زنجیر بنائی۔ادھر جیو ٹی وی کی نشریات پر پابندی کیخلاف پشاور یونیورسٹی میں طالبات نے احتجاجی مظاہرہ کیا، مظاہرے کا اہتمام تحریک انصاف کے طالبات ونگ نے کیا تھا۔ احتجاجی مظاہرے میں طالبات نے جیو ٹی وی کی نشریات پر سے پابندی اٹھانے اور عدلیہ کی آزادی کے حق میں نعرے لگائے۔ مظاہرین نے سیاسی رہنماؤں سے مطالبہ کیا کہ وہ انتخابات کا بائیکاٹ کریں، میڈیا اور عدلیہ کی آزادی کیلئے جدوجہد کریں۔ طالبات کا کہنا تھا کہ ملک بھر میں کیبل پر جیو ٹی وی کی نشریات فوری طور پر بحال کی جائیں۔

__________________