پاکستان کے شہر لاہور میں پولیس کے مطابق ہائی کورٹ کے باہر ہونے والے ایک بم دھماکے میں کم از کم بیس افراد ہلاک اور متعدد زخمی ہوگئے ہیں۔
سٹی پولیس چیف ملک اقبال نے بتایا کہ ہلاک ہونے والوں میں انیس پولیس کے اہلکار ہیں۔ جائے وقوع پر موجود صحافیوں سے گفتگو کرتے ہوئے ان کا کہنا تھا کہ بظاہر یہ خود کش حملہ تھا جس کا ٹارگٹ پولیس اہلکار تھے۔

جائے وقوع پر موجود عینی شاہدین نے بتایا کہ زخمیوں کی تعداد بیس سے زائد ہے اور انہیں میو ہپستال پہنچایا جارہا ہے۔ ہلاکتوں کی تعداد میں اضافہ کا خدشہ ہے۔

یہ دھماکہ اس مقام پر ہوا جہاں کچھ دیر بعد وکیلوں کی احتجاجی ریلی پہنچنے والی تھی۔ وکیل ہر جمعرات کو احتجاجی مظاہرہ اور عدالتوں کا بائیکاٹ کرتے ہیں۔

وکیلوں کی ایک ریلی ایوان عدل سے ہائی کورٹ کی جانب روانہ ہوچکی تھی جبکہ ہائی کورٹ بار ایسوس ایشن کا اجلاس ختم ہونے کے بعد یہ اعلان ہو چکا تھا کہ وکیل ریلی کے لیے باہر نکلیں لیکن اسی دوران ایک بڑے دھماکے کی آواز سنائی دی گئی۔