لاہور میں وکلاء نے پولیس اور صحافیوں کو شدید تشدد کا نشانہ بنایا جبکہ پنجاب بار اور ڈسڑکٹ بار نے سینئر وکلاء رہنمائوں پر پابندی عائد کر دی ہے۔ اس حوالے سے ٹی وی سکرین پر جو فوٹیج دکھائے گئے ہیں ان میں وکلاء پولیس والوں کو وحشیانہ طریقے سے مار رہے ہیں۔
اس میں شک نہیں کہ ججوں کی بحالی اور عدلیہ کی آزادی کے لئے وکلاء نے ایک بے مثال تحریک چلائی اور کامیابی حاصل کی لیکن وہ تحریک تو آئین اور قانون کی بالادستی کے لئے تھی اور اب جو ہنگامہ آرائی کی جارہی ہے یہ تو سراسر قانون شکنی ہے تو اس حوالے سے پہلا سوال یہ پیدا ہوتا ہے کہ کیا یہ ممکن ہے کہ جو لوگ قانون اور آئین کی بالادستی پر یقین رکھتے ہوں وہی لوگ قانون شکنی پر اتر آئیں اور کالے کوٹ کے تقدس کے ساتھ ساتھ عدلیہ کے تقدس کو بھی پامال کرکے رکھ دیں!
ہم سمجھتے ہیں کہ قانون پسند لوگ کبھی بھی قانون شکنی کا راستہ اختیار نہیں کرتے اور جو لوگ ہنگامہ آرائی کر رہے ہیں ان میں کچھ جذباتی نوجوان وکیلوں کے ساتھ ساتھ ایسے لوگ بھی ہیں جن کے پاس وکالت کا لائسنس ہی نہیں ہے اور وہ کالے کوٹ پہن کر اور کالی ٹائیاں لگا کر ایک سوچے سمجھے منصوبے کے تحت حالات بگاڑ رہے ہیں۔ دوسرے لفظوں میں یوں سمجھئے کہ عدلیہ کے فیصلوں کی راہ میں روڑے اٹکانے کے لئے ایک منصوبہ بند سازش پر عمل ہو رہا ہے اور کچھ لوگوں کو بطور آلہ کار استعمال کیا جارہا ہے۔
درحقیقت کرائے کے لوگ کبھی بھی جینوئن لوگوں کو شکست نہیں دے سکتے اس لئے قانون پسند وکلاء کو اب سامنے آکر کالی بھیڑوں کی نشاندہی کرنی چاہیے اور اس سازش کو بھی بے نقاب کر دینا چاہیے جو عدلیہ کو الجھانے کے لئے تیار کی گئی ہے۔
ممکن ہے کہ بعض وکلاء اور شرپسندوں کے ذریعے جو کھیل کھیلا جارہا ہے وہ اس نوعیت کا آخری کھیل ہو کیونکہ یہ ممکن ہی نہیں کہ عدلیہ اور میڈیا کے ساتھ اس درجے کی محاذ آرائی کا نتیجہ ان لوگوں کے حق میں اچھا نکلے جنہوں نے اس سارے منصوبے کے تانے بانے بنے یا جو لوگ اس معاملے میں استعمال ہوئے۔ پاکستانی وکلاء میں اکثریت ان لوگوں کی ہے جو آئین اور قانون کا احترام کرتے ہیں اور اگر احتجاج بھی کرتے ہیں تو انتہائی مہذب انداز میں۔ یہ لوگ آج نہیں تو کل میدان میں ضرور آئیں گے کیونکہ کالے کوٹ کے تقدس کی پامالی کے ساتھ ساتھ میڈیا کو بھی بھڑکایا جارہا ہے اور وکلاء کی جینوئن قیات ہرگز یہ برداشت نہیں کرے گی کہ وکلاء برادری کو اس حد تک بدنام کر دیا جائے کہ عوام کے لئے قانون پسند وکلاء اور قانون شکن وکلاء کو الگ الگ کرکے دیکھنا ممکن نہ رہے اور وہ یہ سمجھنے لگیں کہ پوری وکلاء برادری قانون شکنی پر اتر آئی ہے۔ وہ یہ بھی نہیں چاہیں گے کہ اس میڈیا کے ساتھ بگاڑ پیدا کریں جس نے پورے دو سال تک ان کے ساتھ اظہار یکجہتی کیا اور ان کی تحریک میں جان ڈالی۔ ہماری رائے میں جن وکلاء نے تشدد کا راستہ اختیار کیا ہے اور ایک بڑی سازش میں آلہ کار بنے ہیں بار ایسوسی ایشنوں کو ان کے ساتھ سختی سے نمٹنا چاہیے اور ان کی نشاندہی کرکے انہیں قانون کے حوالے کر دینا چاہیے کیونکہ آئین و قانون کے پاسدار جب قانون شکنی کرتے ہیں تو اس کا مطلب یہ ہوتا ہے کہ وہ اس قابل نہیں رہے کہ آئین و قانون کی پاسداری کا فریضہ انجام دے سکیں۔ عدلیہ کو بھی ایسے لوگوں کے ساتھ سختی سے نمٹنا چاہیے۔ خاص طور پر اعلیٰ عدلیہ کو جس کی خدمت میں ہم بار بار عرض کرتے رہے ہیں کہ وہ اپنے فیصلوں کے ذریعے معاشرے پر اپنی دھاک بٹھائے اور انصاف کی ایسی شاندار نظیریں قائم کرے کہ جرائم پیشہ لوگ آئین اور قانون کی دہشت سے لرزنے لگیں۔ حقیقت یہ ہے کہ جن ملکوں میں آئین اور قانون کی دہشت قائم ہو جاتی ہے وہاں جرائم بھی کم ہو جاتے ہیں اور دہشت گردی کو پنپنے کا موقع بھی نہیں ملتا۔ جرم اور مجرم اس معاشرے میں پنپتے ہیں جہاں یا تو قانون کمزور ہوتا ہے یا عدلیہ مصلحتوں کا شکار ہو جاتی ہے۔
اعلیٰ عدلیہ کے معزز ججوں کو معلوم ہونا چاہیے کہ انہوں نے طرح طرح کے مافیاز پر ہاتھ ڈالا ہوا ہے اور یہ مافیاز پچھلے کچھ برسوں میں انتہائی طاقتور ہوچکے ہیں۔ اب جبکہ انہیں ان کا انجام دیوار پہ لکھا ہوا نظر آرہا ہے تو انہوں نے اپنے بچائو کے لئے ہاتھ پیر مارنے شروع کر دئیے ہیں۔ ان مافیاز کے سرغنوں کی زبانیں پھسل رہی ہیں اور جس نفرت اور کرودھ کو وہ ایک عرصے سے دبائے پھرتے تھے وہ اب باہر آنا شروع ہوگیا ہے۔ وہ ہر اس شخص کو للکاریں گے۔ ہر اس ادارے کو للکاریں گے جو ان کو آئین اور قانون کی گرفت میں لینے کی کوشش کرے گا ۔ ان لوگوں نے جو کارڈز محفوظ کر رکھے ہیں' اب ایک ایک کرکے کھیلیں گے کیونکہ مجرم جب قانون کے شکنجے میں آنے لگتے ہیں تو وہ آگ اور خون کا کھیل کھیلتے ہیں۔ وہ ہر اس شخص کو راستے سے ہٹانے کی کوشش کرتے ہیں جو ان کے آڑے آرہا ہو۔ ہم تو ان سطور کے ذریعے اپنے آرمی چیف سے بھی عرض کریں گے کہ وہ چوکنا رہیں کیونکہ مختلف اقسام کے مافیاز اور ان کے سرغنہ اب دہشت کے کھیل پر اتر آئے ہیں اور ان کے اندر کی وحشت انہیں خانہ جنگی کرانے کے انتہائی اقدام پر بھی اکسا سکتی ہے۔ ممکن ہے کہ اس سازش کو پولیس اور دیگر قانون نافذ کرنے والے ادارے نہ دبا سکیں اور اسے کچلنے کے لئے فوجی طاقت کی ضرورت پڑے۔
ہم پرامید ہیں کہ پاکستان کے امن پسند عوام' افواج پاکستان' عدلیہ اور محب وطن سیاسی جماعتیں اپنے ملک کو چند جرائم پیشہ افراد کے ہاتھوں میں یرغمال نہیں بننے دیں گے۔ جو لوگ یہ شرپسندانہ کھیل کھیل رہے ہیں انہیں پتہ ہونا چاہیے کہ وہ انجام کار اپنے کئے کی سزا پائیں گے اور پاکستان کو عدم استحکام سے دوچار کرنے کی سازش میں ناکام رہیں گے کیونکہ اس ملک کی حفاظت کرنے والے عوام اور افواج پاکستان اپنے وطن کی حفاظت کرنا اور اسے شرپسندوں سے پاک کرنا جانتے ہیں

__________________
جاویداسد