آزاد عدلیہ اور معزول ججز کی بحالی کے لئے لاہور سے لانگ مارچ کا آغاز ہوگیا ہے جسے روکنے کے لئے حکومت نے پاکستان مسلم لیگ نواز کے سربراہ نواز شریف ، وکلاء رہنماء بیرسٹر اعتزاز احسن،لیاقت بلوچ، جاوید ہاشمی اور دیگر اہم رہنمائوں کو نظر بند کرلیا ہے۔

جبکہ لانگ مارچ کے شرکاء کو منتشر کرنے کےلئے لاٹھی چارج، آنسو گیس شیلنگ اور اسلام آباد جانے سے روکنے کے لئے تمام شاہراہوں کو بند کردیا گیا ہے تاہم مظاہرین کی بڑی تعداد پولیس اور دیگر سیکورٹی فورسز کی جانب سے کھڑی گئیں رکاوٹیں توڑتے ہوئے آگے بڑھ رہی ہے ۔ پولیس اور دیگر سیکورٹی اہلکار بے بس نظر آرہے ہیں۔ مشتعل مظاہرین نے متعددپولیس اہلکاروں کو تشدد کرکے زخمی کردیا ۔


نواز شریف اور اعتزاز احسن بھی نظر بندی کے احکامات کو غیر قانونی قرار دیتے ہوئے باہر نکل آگئے ہیں۔ جبکہ شہباز شریف بھی پولیس کو چکمہ دیتے ہوئے راولپنڈی پہنچنے میں‌کامیاب ہوگئے ہیں۔

نواز شریف کا کہنا ہے کہ 60 سال بعد پاکستانی قوم جاگ اٹھی ہے اس کی آواز کو دبانا کسی کے بس کی بات نہیں۔

ادھر جڑواں شہروں اسلام آباد اور راولپنڈی میں لانگ مارچ کے شرکاء کو روکنے کے لئے تمام داخلی بند کردیئے گئے ہیں اور شاہراہوں‌پر کنٹینرز لگا کر ہر قسم کی آمدروفت معطل کردی ہے ۔ جس کے باعث معمولات زندگی بری طرح متاثر ہوگئے ہیں اور شہریوں‌کو سخت مشکلات کا سامنا ہے