لبنانی اور اسرائیلی فوج کے درمیان جھڑپ میں تین لبنانی فوجی اور ایک اسرائیلی افسر ہلاک ہو گئے ہیں۔

یہ جھڑپ سنہ دو ہزار چھ میں اسرائیلی فوج اور حزب اللہ کے درمیان ہونے والی جنگ کے بعد پہلی جھڑپ ہے۔

منگل کے روز ہونے والی جھڑپ میں ایک لبنانی صحافی بھی ہلاک ہوا۔

لبنان کا کہنا ہے کہ فوج نے اس وقت فائر کیا جب اسرائیلی فوج لبنان میں داخل ہو گئی تھی۔ تاہم اسرائیل نے اس الزام کی تردید کی ہے۔

لبنانی فوج کا کہنا ہے کہ یہ جھڑپ اس وقت ہوئی جب اسرائیلی فوج لبنان میں لگے ایک درخت کو گرانے کے لیے گھس آئی۔ ان کا کہنا ہے کہ اس درخت سے اسرائیلی فوج کو سرحدی گاؤں ادیسے پر نظر رکھنے میں دقت ہو رہی تھی۔

لبنانی فوج کے ترجمان کا کہنا ہے کہ لبنانی فوج نے خبردار کرنے کے لیے فائر کیے اور جواب میں اسرائیل نے گولہ باری کی اور ہیلی کاپٹروں سے شیلنگ کی۔

لبنانی فوج نے تصدیق کی ہے کہ اس جھڑپ میں تین لبنانی فوجی ہلاک اور چار زخمی ہوئے ہیں۔

الاخبار نامی اخبار کا کہنا ہے کہ ان کا ایک صحافی بھی اس جھڑپ میں ہلاک ہوا ہے۔

دوسری جانب حزب اللہ کے سربراہ شیخ حسن نصر اللہ نے کہا ہے کہ ان کے جنگجو خاموش تماشائی نہیں بنے رہیں گے اگر اسرائیلی فوج لبنان میں دوبارہ داخل ہوئی۔

اسرائیلی فوج کی ایک ترجمان نے بی بی سی کو بتایا کہ اسرائیلی فوجی اسرائیلی سرحد میں معمول کے کام پر معمور تھے کہ لبنانی فوج کے سنائپرز نے ایک دھاوے میں دو افسر ہلاک کر دیے۔

اس سے قبل اسرائیلی فوجی کمانڈر میجر جنرل غادی نے کہا کہ اسرائیلی فوجی افسر تین سو سے چار سو میٹر سرحد کے اندر کھڑے فوجیوں کے کام کی نگرانی کر رہے تھے جو سرحد کے پاس لگی جھڑیاں ہٹا رہے تھے۔

’سنائپرز نے ان دو افسران کو نشانہ بنایا۔‘ انہوں نے مزید کہا کہ ان کو یقین ہے کہ ایسا واقعہ دوبارہ پیش نہیں آئے گا۔ ’ہمیں لبنانی فوج کی اعلیٰ قیادت کی جانب سے درخواست اور مطالبات آئے ہیں کہ جنگ بندی کی جائے۔

بی بی سی اردو

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !