لندن ( جنگ نیوز) لاہور میں احمدیوں کی دو عبادت گاہوں پر دہشت گردوں کے حملے کے بعد جس میں کم وبیش 90 بے قصور افراد ہلاک ہوگئے تھے پاکستانی ہائی کمشنر نے ہائی کمیشن کے ایک سینئر رکن کے ساتھ احمدیوں کے مذہبی رہنما مرزا مسرور احمد سے ملاقات کرکے ہلاکتوں پر اظہار تعزیت کیا ، پاکستانی ہائی کمشنر نے اس افسوسناک واقعے پر احمدی جماعت کے ارکان، پاکستانی کمیونٹی کے ارکان اور سوگوار خاندانوں سے اظہار تعزیت کرتے ہوئے کہا کہ پاکستان کی پوری سیاسی قیادت کے علاوہ عام لوگوں نے بھی اس بہیمانہ کارروائی کی مذمت کی ہے ، حکومت پاکستان اور کسی عام آدمی نے ان بہیمانہ وارداتوں کو معاف یا نظر انداز نہیں کیا، احمدیوں کے روحانی رہنما نے اس سانحے پر تشویش کااظہار کرنے پر پاکستانی ہائی کمیشن اور حکومت پاکستان کا شکریہ ادا کیا۔ان حملوں کی شدید مذمت کرتے ہوئے مرزا مسرور احمد نے حملہ آوروں کو گرفتار کرکے انھیں عبرت ناک سزائیں دینے کا مطالبہ کیا ، انھوں نے اس سے پہلے بھی مذہبی انتہا پسندوں کی جانب سے احمدی برادری سے تعلق رکھنے والے لوگوں کی ٹارگٹ کلنگ کے واقعات کا حوالہ دیا۔ انھوں نے احمدی گروپ کے ساتھ بقول ان کے امتیازی سلوک پر اظہار افسوس کرتے ہوئے اس ضمن میں 1984ء کے آرڈی ننس اور احمدیوں کیلئے علیحدہ انتخابی فہرستوں کاحوالہ دیا۔ہائی کمشنر نے انھیں یقین دلایا کہ ان جذبات سے حکومت پاکستان کو آگاہ کردیا جائے گا ۔انھوں نے پاکستان میں اقلیتوں کے حقوق کے احترام کو یقینی بنانے کیلئے حکومت پاکستان کی جانب سے کئے گئے مختلف اقدامات کا بھی ذکر کیا۔

ویب لنک
پاکستانی ہائی کمشنر کا احمدیوں کے روحانی رہنما سے اظہار تعزیت