لوٹ مار سے کاروباری برادری کا اعتماد ختم ہوگیا، صنعتکار



کراچی (اسٹاف رپورٹر) سانحہ راولپنڈی کے بعد جلاوٴ گھیراوٴ اور لوٹ مار سے کاروباری برادری کا اعتماد ختم ہوگیا ہے۔ حکومت فوری طور پر صنعتی علاقوں میں رینجرز اور پولیس کی تعداد بڑھائے، صنعتی ماحول بہتر نہ بنایا گیا تو اس مالی سال کے تمام اقتصادی اہداف پورا ہونے ناممکن ہیں۔ ان خیالات کا اظہار کراچی کے صنعتی علاقوں کے منتخب نمائندوں نے کراچی پریس کلب میں پریس کانفرنس سے خطاب کرتے ہوئے کیا۔ صنعت کاروں کی نمائندگی کورنگی ایسوسی ایشن آف ٹریڈ اینڈ انڈسٹری کے سرپرست اعلیٰ ایس ایم منیر، چیئرمین مسعود نقی سابق چیئرمین عبدالحسیب خان، داوٴد عثمان جھکورا اور دیگر کر رہے تھے۔ ایس ایم منیر کا کہنا تھا کہ کورنگی انڈسٹریل ایریا میں 16 فیکٹریاں 7 بینک، 4 پیٹرول پمپ، 2 سرکاری اداروں کے دفاتر، 2 کاروں کے شوروم اور ایک ریسٹورنٹ کو جلایا یا نقصان پہنچایا گیا جس سے تقریباً 20 ارب روپے کا نقصان ہوا۔ ایس ایم منیر کا کہنا تھا کہ ہم نے رینجرز سے بات کی ان کا کہنا تھا کہ وہ بیک اپ فورس ہیں ان کے پاس اختیارات نہیں۔ نفری کی کمی ہے آئی جی سندھ بھی یہی کہتے ہیں ایسے حالات میں پولیس اور رینجرز کی تعداد صنعتی علاقوں کے لیے بڑھائی جائے۔ فوری طور پر کمی فوج کے جوان تعینات کرکے پوری کی جائے۔ حکومت کورنگی کے صنعتی علاقوں سے وصول کردہ ٹیکس کا اگر ڈھائی فیصد صنعتی علاقوں کو دے دیا جائے تو صنعتی علاقے اپنی سیکورٹی کا خود انتظام کرسکتے ہیں۔ پبلک پرائیویٹ پارٹنر شپ کی بنیاد پر صنعتی علاقے اپنی سیکورٹی کا خود انتظام کرسکتے ہیں۔ صنعت کاروں کا موقف تھا کہ حکومت کے پاس کرائسس مینجمنٹ کا کوئی انتظام نہیں ہے تاجر برادری نے صدر پاکستان سے بھی اپیل کی کہ وہ انہیں ملاقات کے لیے وقت دیں اور کاروباری برادری کے اعتماد کو بحال کرنے کے لیے اقدامات کریں۔ اس موقع پر کاٹی کے نومنتخب چیئرمین شیخ فضل جلیل، نارتھ کراچی صنعتی ایریا کے چیئرمین نور احمد اور فیڈرل بی ایریا کے چیئرمین ادریس گیگی بھی موجود تھے۔