لوڈ شیڈنگ سے اخبارات کی اشاعت متاثر نہیں ہونے دینگے، راجہ پرویز اشرف
اسلام آباد (نمائندہ جنگ) وفاقی وزیر برائے پانی و بجلی راجہ پرویز اشرف نے یقین دلایا ہے کہ اخبارات کی طباعت کے اوقات میں بجلی کی لوڈشیڈنگ سے گریز کیا جائے گا اور اس سلسلے میں تمام ممکنہ اقدامات اٹھائے جائیں گے۔ انہوں نے یہ یقین دہانی سی پی این ای اسلام آباد شاخ کے گیارہ رکنی وفد سے ملاقات کے دورا ن کرائی جس نے مہتاب احمد خان کی قیادت میں ان سے ملاقات کی۔ وفد نے لوڈشیڈنگ کی وجہ سے اخبارات کی طباعت متاثر ہونے اور اخبارات کو درپیش مسائل سے آگاہ کیا۔ وفاقی وزیر راجہ پرویز اشرف نے آئیکو کے چیف ایگزیکٹو کو ہدایت کی کہ بغیر شیڈول کے لوڈشیڈنگ نہ کی جائے اور اخبارات کے مالکان سے میٹنگ کرکے لوڈمینجمنٹ کا ایسا شیڈول طے کیا جائے کہ طباعت کا کام متاثر نہ ہو۔ وفاقی وزیر نے وفد کو بتایا کہ اس وقت ملک میں تین ہزار میگاواٹ کی لوڈشیڈنگ ہورہی ہے جس کے لئے پیپکو نے لوڈمینجمنٹ کا پلان بنایا ہے جس پر عملدرآمد کیا جارہا ہے انہوں نے کہا کہ حکومت کی کوشش یہ ہے کہ ایک سال کے اندر بجلی کی لوڈشیڈنگ کم سے کم کی جائے اور تین سال کے اندر اس کا خاتمہ ہوجائے۔ انہوں نے بتایا کہ حکومت پاور سیکٹر میں سرمایہ کا ری لانے کے لئے ایک میکانزم وضع کررہی ہے تاکہ پیداوار میں اضافہ کیا جاسکے اور لوڈشیڈنگ سے نجات حاصل کی جاسکے انہوں نے میڈیا سے اپیل کی کہ وہ اپنے دفاتر میں انرجی سیور بلب استعمال کریں تاکہ بجلی کو بچایا جاسکے۔

__________________