کراچی ( جنگ نیوز) ملک میں ایمرجنسی کے نفاذ کے بعد میڈیا اور جیو پر پابندیوں کو آج چونتیس دن گزر چکے ہیں، کونسل آف پاکستان نیوزپیپرز ایڈیٹرز نے ایک بار پھر جیو سے اظہار یکجہتی کرتے ہوئے لاہور پریس کلب کا دورہ کیا۔میڈیا پر پابندی کے خلاف ملک بھر کے صحافی سراپا احتجاج ہیں، الیکٹرانک اور پرنٹ میڈیا سے وابستہ افراد بلاناغہ لاہور پریس کلب کے احتجاجی علامتی بھوک ہڑتالی کیمپ میں اپنے جذبات کااظہار کرتے ہیں۔ میڈیا پر پابندیوں کے خلاف لاہور پریس کلب میں پنجاب یونین آف جرنلسٹس اور لاہور پریس کلب کے زیر اہتمام صحافیوں کا احتجاج چونتیس ویں دن بھی جاری رہا۔ احتجاجی کیمپ میں سی پی این ای کے ممبران نے بھی شرکت کی اور جیوکے ساتھ اظہار یکجہتی کیا۔سینئر صحافیوں کا کہنا تھا کہ سرکاری یا غیر سرکاری سطح پر کسی کو یہ زیب نہیں دیتا کہ وہ پابندیوں کے خلاف احتجاج اور اظہار رائے پر پابندی لگا کر بنیادی انسانی حقوق کو معطل کرے۔ سی پی این ای اور سینئر ایڈیٹرز کا کہنا تھا کہ موجودہ حکومت نے میڈیا کو آزاد کیا تھا یہ اس کا کریڈٹ ہے لیکن اسکو برقرار رکھنا بھی اسی کی ذمہ داری ہے۔اس لئے فوری طور پر میڈیا کو آزادی دی جانا چاہئے تاکہ لوگوں کو ان کاپسندیدہ چینل دیکھنے کی مکمل آزادی ہو۔لاہور پریس کلب میں سینئر صحافیوں اور ایڈیٹرز کاجیو کے ساتھ اظہار یکجہتی ثابت کرتا ہے کہ میڈیا پر پابندیوں کے خلاف ملک بھر کے صحافی اورسول سوسائٹی کے لوگ متحد ہیں اور سب کی یہ خواہش ہے کہ میڈیا کو فوری طور پر آزاد ہونا چاہئے تاکہ عوام کو خبر کی رسائی تک پہنچ مل سکے ۔

__________________