کراچی (اسٹاف رپورٹر) لیاری میں منگل کو ڈکیتی کے دوران مزاحمت پر فائرنگ کرکے نامعلوم ملزمان نے ایک بھائی کو ہلاک اور دوسرے کو زخمی کردیا جبکہ کورنگی میں ملزمان کو موبائل فون نہ دینے پر کوسٹ گارڈ کے 2 اہلکاروں کو زخمی کردیا۔ ادھر کالاپل سے ڈیفنس پولیس نے 2 ملزمان کو گرفتار کرکے موبائل اور اسلحہ برآمد کرلیا، لیاری کے دونوں بھائی نیوکمہار واڑہ، گبول پارک کے قریب سے گزر رہے تھے کہ نامعلوم ملزمان نے انہیں لوٹنے کی کوشش کی اور مزاحمت پر فائرنگ کرکے 34 سالہ سلیم ولد حاجی قاسم کو ہلاک اور ان کے بڑے بھائی 35 سالہ طارق کو زخمی کردیا۔ متوفی کی لاش اور زخمی کو سول اسپتال پہنچایا گیا۔ دوسری جانب کورنگی میں موبائل فون چھینتے ہوئے مزاحمت پر نامعلوم ملزمان کی فائرنگ سے پاکستان کوسٹ گارڈز کے دو اہلکار عبدالواحد اور طاہر محمود زخمی ہوگئے۔دونوں اہلکار کورنگی نمبر ڈھائی میں کوسٹ گارڈز کے سینٹر میں تعینات ہیں۔ ڈیفنس پولیس نے منگل کو 2 ملزمان نورمحمد اور رحمت اللہ کوڈو کو کالاپل کے پاس سے گرفتار کرکے ان کے قبضے سے 2 مسروقہ موبائل فون، 2 پستول اور ایک خنجر برآمد کرلیا۔ پولیس کے مطابق مذکورہ ملزمان صدر تھانے میں درج بعض مقدمات میں پولیس کو مطلوب تھے۔