لاہور (نمائندہ جنگ) سپریم کورٹ بار ایسوسی ایشن کے صدارتی امیدوار ، قانون دان بیرسٹر اعتزاز احسن نے کہا ہے کہ سپریم کورٹ کے پاس صدر مشرف کو نااہل قرار دینے اور جنرل پرویزمشرف کے پاس بستر بوریا گول کرکے گھر جانے کے علاوہ کوئی دوسرا آپشن موجود نہیں ہے،انہوں نے کہا کہ مارشل لاء کا سوال ہی پیدا نہیں ہوتا،ججوں کو شیر بننا ہوگا۔ انہوں نے کہا کہ سوال ہی پیدا نہیں ہوتا کہ سپریم کورٹ جنرل مشرف کو صدر کے لئے اہل قرار دے۔ وہ مقامی ہوٹل میں وکلاء کے پروفیشنل گروپ کے رکن شاہد محمود بھٹی کی طرف سے اپنے اعزاز میں دی گئی استقبالیہ تقریب میں صحافیوں سے گفتگو کر رہے تھے۔ اعتزاز احسن نے کہا کہ جنرل مشرف کے خلاف فیصلہ آنے پر ملک میں نہ تو مارشل لاء لگ سکتا ہے اور نہ ہی ایمرجنسی لگ سکتی ہے۔ فوج مارشل لاء لگانے کو تیار ہے اور نہ ہی اس میں اتنی صلاحیت ہے۔ جس ملک میں فوج کو کہا جائے کہ وہ گھر سے دفتر اور دفتر سے گھر سویلین کپڑوں میں آئے اور یونیفارم صرف دفتر میں پہنے وہاں ہزاروں مربع میل میں فوج یونیفارم میں کس طرح پھیل سکتی ہے۔ قبائلی علاقوں، وزیرستان اور سرحدوں پر فوج مصروف ہے اور مارشل لاء لگانے کو تیار نہیں جبکہ ایمرجنسی لگی تو فوری چیلنج ہو جائے گی۔ یہ سوال ہی پیدا نہیں ہوتا کہ یہاں سپریم کورٹ کا فیصلہ تسلیم نہ کیا جائے۔ صرف ججوں کو شیر بننا ہوگا۔ ہم تو انہیں کہتے ہیں کہ شیر بنو۔ ایک سوال پر انہوں نے کہا کہ نواز شریف کی وطن واپسی کا فیصلہ تسلیم نہیں کیا گیا لیکن اگر سپریم کورٹ توہین عدالت پر صدر سمیت دیگر ذمہ داروں کو جیل بھجوائے تو دیکھتے ہیں کہ آئندہ کیسے عدالت کا فیصلہ رد کیا جاتا ہے۔

__________________