ابن جلال

تفصیلی خبر


منیلا: پاکستان کے سابق وزیراعظم شوکت عزیز نے کہا ہے کہ عالمی مالیاتی بحران اپنی نوعیت کا شدید ترین بحران ہے اور اس بحران کے خاتمے کیلئے بین الاقوامی مالیاتی فنڈ (آئی ایم ایف) نے قائدانہ کردار ادا نہیں کیا۔

منیلا میں بین الاقوامی بزنس کانفرنس سے خطاب کرتے ہوئے انہوں نے کہا کہ صرف شرح سود میں کمی اور بینکاری کے شعبے کیلئے سرمائے کی ترسیل بڑھانے سے مالیاتی بحران کا مسئلہ حل نہیں ہوگا اور موجودہ صورتحال میں عالمی مالیاتی بحران کو شدید خطرات لاحق ہیں اور ہر ملک اپنے قواعدوضوابط کے لحاظ سے اس سے نمٹنے کی کوشش کر رہا ہے۔

انہوں نے کہا کہ اگر ہم نے اس مسئلے کے حل کیلئے اقدامات نہ کئے تو اس سے مسائل پیدا ہوتے رہیں گے۔ انہوں نے کہا کہ آئی ایم ایف کو اپنے اختیارات میں اضافے کے ساتھ ساتھ ایک طاقتور ادارے کے طور پر کام کرنا چاہئے۔ اس وقت دنیا کو روایتی مالیاتی پالیسی کے حوالے سے جن خطرات کا سامنا ہے انہیں فوری طور پر حل کرنے کیلئے اقدامات کی ضرورت ہے۔ آئی ایم ایف اور دوسرے عالمی ادارے اس سلسلے میں بہتر کردار ادا کرسکتے ہیں کیونکہ موجودہ بحران اپنے نوعیت کا ایک بڑا اور شدید ترین بحران ہے۔