لاہور، پشاور ( نمائندہ جنگ، پ ر) متحدہ قومی موومنٹ نے 8 جنوری کو ہونے والے انتخابات کیلئے پنجاب، بلوچستان اور سرحد سے حق پرست امیدواروں کے ناموں کا اعلان کردیا ہے۔ پنجاب میں ایم کیو ایم کے مرکزی رہنما سینیٹر بابر غوری نے حق پرست امیدواروں کے ناموں کا اعلان کیا۔ لاہور میں پریس کانفرنس سے خطاب کرتے ہوئے انہوں نے کہا کہ ملک میں ایمرجنسی کا خاتمہ کرکے جمہوری نظام اور ادارے مضبوط بنائے جانے چاہئیں۔ انہوں نے بتایا کہ ایم کیو ایم نے پنجاب میں قومی اسمبلی کی 45 اور پنجاب اسمبلی کی 68 نشستوں کیلئے امیدوار نامزد کیے ہیں، اس ہی طرح قومی اور صوبائی اسمبلی میں خواتین کی مخصوص نشستوں کیلئے چار، چار اور اقلیتی نشست کیلئے ایک امیدوار میدان میں ہے۔ ان کا کہنا تھا کہ ان امیدواروں میں کوئی وڈیرہ، جاگیردار یا بڑا سرمایہ دار نہیں ہے بلکہ یہ سب متوسط طبقے کی نمائندگی کرتے ہیں۔ سینیٹر بابر خان غوری نے کہا کہ ان کی جماعت کی ق لیگ یا پیپلز پارٹی سے سیٹ ایڈجسٹمنٹ کے حوالے سے کوئی بات چیت نہیں ہوئی۔ انہوں نے کہا کہ ملکی نظام کو آئین کے مطابق چلنا چاہئے اور تمام گرفتار سیاسی کارکنوں اور وکلا کو رہا کیا جانا چاہئے۔ دوسری جانب صوبہ سرحد سے قومی اسمبلی کی 12 اور صوبائی اسمبلی کی 14 نشستوں کیلئے بھی ایم کیو ایم کے نامزد امیدواروں کے ناموں کا اعلان کردیا گیا ہے۔ یہ اعلان ایم کیو ایم کی سرحد کیلئے نگراں کمیٹی کے ارکان سابق وفاقی وزیر شمیم صدیقی، عبدالوسیم اور احمد علی نے پریس کانفرنس کے دوران کیا۔ انہوں نے کہا کہ ایم کیو ایم فرسودہ جاگیردارانہ اور ظالمانہ نظام کیخلاف جدوجہد کر رہی ہے، سرحد کے عوام بھی خان و خوانین کے ظالمانہ نظام کا خاتمہ چاہتے ہیں۔ انہوں نے کہا کہ عوام ملک کی ترقی و استحکام اور خان و خوانین کے ظالمانہ نظام کے خاتمے کیلئے ایم کیو ایم کے امیدواروں کو ووٹ دے کر کامیاب بنائیں۔ کوئٹہ میں حق پرست سینیٹر ڈاکٹر محمد علی بروہی نے قومی اسمبلی کی 6 اور صوبائی اسمبلی کی 16، مخصوص نشست برائے خواتین پر ایک اور اقلیتی نشست پر 2 امیدواروں کے ناموں کا اعلان کیا۔ انہوں نے کہا کہ متحدہ قومی موومنٹ کا عزم تھا کہ وہ پورے ملک سے دیانتدار اور باکردار امیدوار سامنے لائے گی، تمام امیدوار قائد تحریک الطاف حسین کی ہدایت کے مطابق عوام کی خدمت میں کوئی کسر نہ اٹھا رکھیں گے۔ ایم کیو ایم کے نامزد کردہ امیدواروں کے ناموں کی فہرست پیر کی اشاعت میں ملاحظہ فرمائیے۔

__________________