متحدہ کو نواز شریف سے بات کرنے کا کوئی شوق نہیں، رابطہ کمیٹی
کراچی (پ ر) متحدہ قومی موومنٹ کی رابطہ کمیٹی نے مسلم لیگ نواز گروپ کے سربراہ نواز شریف کے بیان پر تبصرہ کرتے ہوئے پاکستان بھر کے عوا م کو مخاطب کرکے کہا ہے کہ قائد تحریک الطاف حسین گزشتہ کئی ماہ سے خصوصاً انتخابات کے دوران بار بار تمام سیاسی و مذہبی جماعتوں سے افہام و تفہیم کی اپیلیں کرتے رہے ہیں اور انتخابی نتائج سامنے آنے کے بعد انہوں نے پیپلزپارٹی کے کو چیئرمین آصف علی زرداری، عوامی نیشنل پارٹی کے صدر اسفندیارولی کے ساتھ ساتھ نواز شریف کو بھی ان کی پارٹی کی کامیابی پر مبارکباد پیش کی لیکن ملک بھر کے عوام خود دیکھ لیں کہ متحدہ قومی موومنٹ کے اس مثبت طرز عمل کے جواب میں نواز شریف آج بھی اپنے مذموم عزائم اور ذہنیت کی یہ کہہ کر عکاسی کررہے ہیں کہ متحدہ قومی موومنٹ سے بات چیت نہیں کریں گے۔ رابطہ کمیٹی نے کہا کہ نواز شریف بیان دے رہے ہیں کہ متحدہ قومی موومنٹ سے بات نہیں ہوگی تو سوال یہ پیدا ہوتا ہے کہ ان کے پاس متحدہ قومی موومنٹ کی طرف سے کون بات کرنے جارہا ہے جو یہ ایسے بیانات جاری کررہے ہیں۔ رابطہ کمیٹی نے کہا کہ عوام نے نواز شریف کا منفی اور متعصبانہ طرز عمل دیکھ لیا ہے اور آج ہم واضح طور پر یہ کہنا چاہتے ہیں کہ متحدہ قومی موومنٹ کو نواز شریف جیسے متعصبانہ عناصر سے بات کرنے کا کوئی شوق نہیں ہے جو ملک و قوم کی بہتری کیلئے مثبت سوچ رکھنے کے بجائے متعصبانہ طرز عمل کا مظاہرہ کررہے ہیں۔

__________________