متضاد تفصیلات، شہادتیں ضائع ہوگئیں، اسکاٹ لینڈ یارڈ سوالوں کا کیا جو اب دیگی



اسلام آباد (جنگ نیوز)پاکستان میں چند ہی ایسے لوگ ہونگے جو اس بات پر یقین کریں گے کہ برطانوی اسکاٹ لینڈ یارڈ کی پولیس حزب اختلاف کی لیڈر بے نظیر بھٹو کے قتل کے حو الے سے موجود سوالوں کا حل پیش کرسکے گی، بیشتر شہادتیں مٹادی گئی ہیں اور موت کے حوالے سے ایک دوسرے کے متضادتفصیلات 27/ دسمبر کو موت گولی سے واقع ہوئی یا خودکش حملہ کے نتیجہ میں پہلے ہی حکومت اور بینظیر کی جماعت کے مابین جاری جنگ میں نیا سیاسی محاذ بن گئی ہے۔ قتل کے بارے میں تفصیلات اس طرح سامنے آتی ہیں#…بینظیر بھٹو انتخابی مہم چلارہی تھیں اور راولپنڈی میں جلسہ عام کے بعد اپنی گاڑی کے سن روف سے لوگوں کے استقبالی نعروں کا ہاتھ ہلا کر جواب دے رہی تھیں#… پستول سے مسلح شخص نے بہت قریب سے ان پر متعدد گولیاں چلائیں، جس کے نتیجے میں وہ کار کی سیٹ پر آن گریں۔ حکومت کا کہنا ہے کہ 3/ گولیاں چلیں #… فائرنگ کے چند لمحوں کے بعد ان کی کار سے چند گز کے فاصلہ پر خودکش حملہ آور نے بم دھماکہ کیا، جس میں وہ خود اور فائرنگ کرنے والے کے علاوہ 22/ افراد ہلاک ہوئے #… موت کا سبب معلوم نہیں ہوسکا۔ حکومت کا کہنا ہے کہ گولی چلانے والے کا نشانہ خطا ہوگیا اور وہ گاڑی میں لگے سن روف کے لیور سے ٹکرانے کے بعد جاں بحق ہوئیں۔ بینظیر بھٹو کے ساتھی قسم کھاتے ہیں کہ ان کے سر میں گولی ماری گئی تھی۔ پارٹی کا اب بھی اصرار ہے کہ گولی لگی تھی۔ حملے کے بعد ان کی لاش کا معائنہ کرنے والے ڈاکٹروں کا کہنا ہے کہ ان کے سر میں کوئی چیز ایسی لگی تھی کہ جو ان کے دائیں کان کے پیچھے کھوپڑی میں اندر داخل ہوئی اور جسم کے اندر کوئی تیز دھار چیز یا گولی نہیں پائی گئی، حملے کے فوری بعد جائے وقوع کو دھودیا گیا۔