مجبور کیا گیا تو سول نافرمانی کی تحریک چلائی جائے گی،اے پی ڈی ایم کراچی. . . .اے پی ڈی ایم کے رہنماؤں نے کہا ہے کہ ہما ری تحریک کا مقصد آئین اور جمہوریت کی بحالی ہے اگر راستے میں رکاوٹیں اٹکانے کی کوشش کی گئی یا مجبور کیا گیا تو سول نافرمانی کی تحریک چلائی جائے گی۔جبکہ ججز کی بحالی کی تحریک اور دھرنے کی تاریخ طے کرنے کیلئے اسٹیرنگ کمیٹی بنادی گئی ہے جووکلاء اور سیاسی جماعتوں سے رابطے کرکے 7جولائی تک حتمی سفارشات پیش کرے گی۔ اے پی ڈی ایم کی قومی کانفرنس کے بعد تحریک کے کنوینئر محمود خان اچکزئی ، قاضی حسین احمد،عمران خان اور دیگر رہنماؤں نے پریس کانفرنس کے دوران مشترکہ اعلامیہ کا اعلان کیا۔ پریس کانفرنس سے خطاب کرتے ہوئے رہنماؤں کا کہنا تھا کہ وہ مجوزہ آئینی کو نہیں مانتے یہ پیکیج مجوزہ آئینی پیکیج صدر پرویز کے غیر آئینی اقدامات کو تحفظ دینے کے لئے بنایا گیاہے۔ہماری جدوجہد دو نومبر کی عدلیہ کی واپسی تک جاری رہے گی اور عدلیہ کو دو نومبر کی پوزیشن پر واپس لایا جائے ۔انہوں نے بتایاکہ آئندہ کا لائحہ عمل طے کرنے کیلئے جولائی کے پہلے ہفتے میں اجلاس منعقد کیا جائے گا۔انہوں نے مزید کہا کہ اے پی ڈی ایم وکلاء کے لانگ مارچ پر پاکستانی قوم کومبارکباد پیش کرتی ہے۔رہنماؤں کا یہ بھی کہنا تھا کہ ہم سب مل کر ملک کو جمہوری اور فلاحی ملک بنانے کیلئے اپنا کردار ادا کرینگے، انہوں نے تمام سیاسی قائدین سے اپیل کی کہ 16کروڑ عوام کا راستہ نہ روکا جائے۔ بجٹ کے حوالے سے ان کا کہنا تھا کہ نیا بجٹ ٹیکسز سے بھرپوراور امیروں کے تحفظ کے لئے بنایا گیا ۔سبسڈیز کو بحال اور روز مرہ اشیاء کی قیمتیں کم کی جائیں۔اے پی ڈی ایم کے رہنماؤں نیصدر پرویز مشرف سے فوری طورپر مستعفی ہونے، بلوچستان آپریشن فوری بند کرنے ،گرفتار رہنماؤں کی رہائی، لاپتہ افراد کی بازیابی،کراچی میں سانحہ نو اپریل کی عدالتی تحقیقات اور جاں بحق ہونے والے وکلاء کے قاتلوں کی گرفتاری ا ور جیو نیوز پر عائد پابندی ختم کرنے کے مطالبات بھی کئے۔

__________________